İğtişaşlar Fransaya 1 milyard avrodan çox ziyan vurub...

Fransada iğtişaşlar nəticəsində dəyən itkilər bir milyard avrodan çox qiymətləndirilir.

Poliqon xəbər verir ki, bu rəqəmi Fransa Sahibkarlar İttifaqının (Medef) rəhbəri Joffrua Ru de Bezye Parisien nəşrinə verib. O, əlavə edib ki, bu məbləğ turizm sektorunda itkiləri nəzərə almır.

“Dəqiq rəqəmlər haqqında danışmaq hələ tezdir, lakin turizmə dəyən zərəri nəzərə almasaq, bir milyard avrodan çox ziyandan söhbət gedir”, - deyə Bezye bildirib.

Bezyenin sözlərinə görə, Fransada 300 bank filialı dağıdılıb, 250 köşk zədələnib, 200-dən çox müxtəlif ticarət müəssisəsi tamamilə talan edilib.

Fransa İqtisadiyyat Nazirliyinin verdiyi məlumata görə, talançıların hərəkətləri nəticəsində 10-a yaxın ticarət mərkəzi və 200 ərzaq mağazası zərər çəkib. Bundan əlavə, Daxili İşlər Nazirliyinin məlumatına görə, iğtişaşçılar ölkə üzrə 3,8 minə yaxın avtomobili yandırıblar.

Qeyd edək ki, Fransada etirazlar və iğtişaşlar ötən çərşənbə axşamı, iyunun 27-dən bəri davam edir. Fransada iğtişaşlar başlayandan bəri, ümumilikdə, azyaşlılar da daxil olmaqla üç mindən çox adam saxlanılıb.

Poliqon.info