Yəmənin “Ənsar Allah” hərəkatının sözçüsü Yəhya Sariya bildirib ki, husilər İsrailin cənubunda yerləşən Eylat şəhərindəki hərbi obyektə ballistik raketlə hücum ediblər.
Poliqon xəbər verir ki, bu barədə Al Masirah telekaanalı məlumat yayıb. Yəhya Sariya raketin hədəfinə çatdığını iddia edib.
“Yəmən silahlı qüvvələri işğal olunmuş Fələstinin cənubundakı Umm ər-Rəşrəş (Eilatın ərəbcə adı) bölgəsində İsrail düşməninin hərbi hədəfinə “Fələstin” ballistik raketi ilə zərbə endirib”, deyə Yəhya Sariya bildirib.
Husilərin hərbi sözçüsü qeyd edib ki, “Fələstin” ballistik raketi ilk dəfə istifadə olunub. Raketin xüsusiyyətləri verilmir.
“Yəmən Silahlı Qüvvələri Qəzza zolağındakı təcavüzü və blokadası bitənə qədər Fələstin xalqına dəstək məqsədilə hərbi əməliyyatlarını davam etdirəcək”, deyə Husilərin rəsmi sözçüsü əlavə edib.
Qeyd edək ki, Yəmənin Qırmızı dəniz sahillərinin böyük hissəsinə nəzarət edən İranın dəstəklədiyi “Ənsar Allah” hərəkatı Qəzza müharibəsinin başlamasından sonra Fələstinin HƏMAS hərəkatını dəstəklədiyini və İsraillə əlaqəsi olan bütün gəmilərə hücum edəcəyini bildirib. ABŞ və Böyük Britaniya gəmiləri də hücuma məruz qalıb. Onlar cavab olaraq Yəmən ərazisinə hücum etməyə başlayıblar.
Poliqon.info
Digərxəbərlər
Populyar xəbərlər
