Fransa Ermənistana hava hücumundan müdafiə sistemləri üçün raketlər verə bilər

Poliqon xəbər verir ki, bu barədə Fransanın müdafiə naziri Sebastyan Lekornu erməni həmkarı Suren Papikyanla birgə brifinqdə deyib.

"Hava hücumundan müdafiə haqqında danışırıqsa, qısa, orta və digər mənzilli raketlərlə bağlı deyə bilərəm ki, Ermənistana lazımdırsa, o zaman bu raketlər də sizin ixtiyarınıza veriləcək", deyə nazir bildirib.

Fransa Silahlı Qüvvələrinin rəhbərinin sözlərinə görə, iki silahlı qüvvə arasında əməkdaşlığın geniş planları var.

Fevralın 23-də Fransanın müdafiə naziri Sebastyan Lekornu ilk dəfə Ermənistana səfər edib. Ermənistan Müdafiə Nazirliyinin inzibati kompleksində fəxri qarovul dəstəsinin və hərbi orkestrin iştirakı ilə hərbi idarə rəisinin təntənəli qarşılanma mərasimi olub.

Noyabrda Fransanın "Bastion" çoxməqsədli zirehli texnikasını Ermənistana ötürdüyü, Ukraynanın isə bundan imtina etdiyi bildirilirdi.

Poliqon.info