“Bunlar əsasən azərbaycanlı QUMcuq tələbələr və azərbaycanca yazı yaza bilən ermənilərdir”

“Artıq xeyli müddətdir, Qumda və İrəvanda sosial mediada şəxsimə qarşı təbliğat aparılması üçün xüsusi qruplar yaradılıb. Bunlar əsasən azərbaycanlı QUMcuq tələbələr və azərbaycanca yazı yaza bilən ermənilərdir. Qumdan Müsəlman Birliyi təşkilatı vasitəsilə materialları Milli Şura trollarına ötürürlər, xaricdəki söyüş müxalifəti ilə birlikdə bütün cinahlarda hücuma keçirlər”.

Bunu Milli Məclisin deputatı Fazil Mustafa deyib.

F.Mustafa qeyd edib ki, buradakı erməni şəbəkəsi də ayrı-ayrı təhrif olunmuş mətn, karrikatura, yaxud da kollaj formasında əleyhimə təbliğat prosesini guya müstəqil şəkildə öz bloqlarında aparırlar: “Bəzən sadəlövh insanlarımızın bu axına düşərək canfəşanlıq etməsini görəndə hələ də ayılmadığımızı görürəm. Hər gün xaricdən maliyyələşən saytlarda ayrıca yalan informasiyalarla dolu məqalələr də yerləşdirilir. Məzhəbçi-tarixçi səhifələrdə də bu təbliğat geninə boluna aparılır. Sözümün canı odur ki, düşmənin qarşısında duruşumuz elə də asan başa gəlmir. Ancaq dirənişimizi göstərməsək, bu qüvvələrin üzərinə hücuma keçməsək informasiya məkanımızda Vətən xainləri istənilən formada proseləri yönəldə biləcəklər. Yəni çatdırmaq istədim ki, bircə cümləmi belə dəqiq göstərib bizə qarşı ittiham irəli sürə bilməzlər. Aylardır, cümlələri mətndən çıxarıb təhrif edərək tirajlayırlar, müxtəlif platformalarda söyüş və təhqirlə nüfuzdan salmağa çalışırlar. Bu prosesdə iqtidarda təmsil olunan və ayrı-ayrı guya müxalif mövqe nümayiş etdirən bloqerləri maliyyələşdirən şəxslərin təlimatları barədə də ipuclarına malikəm. Ona görə də daha ayıq-sayıq olmalıyıq, qumcuqların, ordakı-burdakı ermənilərin, milli cahillərimizin ortaqlaşa gerçəkləşdirdiyi layihələri pozmalıyıq”.

pia.az