Avropa İttifaqının Ukrayna böhranı və Qəzza zolağındakı müharibəyə reaksiyasında fərqliliklər Avropa ölkələrinin ərəb dünyası, Afrika və digər regionlarla münasibətlərində ciddi problemlər yaradıb...
Poliqon xəbər verir ki, bu barədə Avropa diplomatiyasının rəhbəri Cosep Borrell öz bloqunda bildirib.
Seçkilər ərəfəsində Avropa diplomatiyasının rəhbəri kimi fəaliyyətinə faktiki yekun vuran yazısında Borrell bildirib ki, Aİ-nin “qətiyyətli” hərəkət etdiyi Ukraynadan fərqli olaraq, Qəzzada Avropa ölkələri humanitar fəlakətə son qoymağa və girovları azad etməyə, o cümlədən döyüşləri dayandırmağa nail ola bilməyiblər.
“Xarici siyasətdə birliyin olmaması ərəb dünyasında, eləcə də Afrika, Latın Amerikası və Asiyanın bir çox ölkələrində bizə baha başa gəldi. Ukrayna və Fələstindəki müharibələrə verdiyimiz fərqli reaksiya Rusiya təbliğatı tərəfindən geniş şəkildə istifadə edilib”, deyə Avropa diplomatik xidmətinin rəhbəri yazıb.
Borrelin sözlərinə görə, Aİ-nin Yaxın Şərqdəki hadisələrə reaksiyası bəzən ABŞ-ın mövqeyindən, məsələn, İordan çayının qərb sahilindəki zorakı məskunlaşanlara qarşı sanksiyalarla bağlı mövqeyindən geridə qalıb.
Eyni zamanda, Aİ diplomatiyasının rəhbərinin fikrincə, Rusiya təbliğatı dünyanın qalan hissəsinin Brüsselin hərəkətlərindən, o cümlədən koronavirus pandemiyası zamanı peyvəndlərin qeyri-bərabər paylanmasından, miqrasiya siyasəti və problemlərdən narazı olması səbəbindən uğurlu olub.
Avropalı diplomat əmindir ki, Aİ bütün diqqətini “dünyanın qalan hissəsi Qərbə qarşı” prinsipi üzrə ölkələrin konsolidasiyasının qarşısını almağa yönəltməlidir.
Poliqon.info