Belqrad Kosovoya türk silahlarının verilməsindən narahatdır. Bunula bağlı Türkiyənin Serbiyadakı səfirinə etiraz notası təqdim edilib...
Poliqon xəbər verir ki, bu barədə Serbiyanın RTS telekanalının efirində Serbiyanın Müdafiə Nazirliyinin katibi Nemanya Staroviç məlumat verib.
“Türkiyə Priştinanı aktiv şəkildə silahlandırır və bu, risklərin səviyyəsini artırır”, deyə Staroviç bildirib.
Rəsminin sözlərinə görə, Serbiya kəşfiyyat xidmətləri Türkiyənin Priştinanı pilotsuz təyyarələr, tank əleyhinə sistemlər, minaatanlar və digər silah növləri ilə təmin etdiyi barədə məlumatlara malikdir, lakin bu, Kosovo ilə bağlı bir sıra beynəlxalq sənədlərə ziddir.
“Serbiya Türkiyənin Belqraddakı səfirinə etiraz notası təqdim edib. Biz əlimizdə olan bütün kanallardan istifadə edərək Türkiyəni Ankaranın bu addımlarının bizim üçün qəbuledilməz olduğu və bizi narahat etdiyi barədə xəbərdar edirik”, deyə Staroviç qeyd edib.
Staroviç xatırladıb ki, türk pilotsuz təyyarələri bu yaxınlarda Kosovo kabinetinin rəhbəri Albin Kurti tərəfindən ictimaiyyətə təqdim edilib, ona görə də indi hamı bundan xəbərdardır:
“Amma təəssüf ki, söhbət təkcə “Bayraktar” pilotsuz təyyarələrindən deyil, həm də çox mürəkkəb OMTAS tank əleyhinə sistemlərdən, minaatanlardan, qumbaraatanlardan və digər silahlardan gedir. Bu, ilk növbədə, Kosovoda yaşayan serb əhali və bütövlükdə bütün Serbiya üçün risk və təhdidlərin səviyyəsini artırır”.
Xatırladaq ki, türklər Priştinada hərbiləşdirilmiş Kosovo Təhlükəsizlik Qüvvələrinə (KSF) pilotsuz təyyarələr tədarük etmək qərarına gəldikdən sonra Serbiya hakimiyyəti Türkiyədən "Bayraktar" PUA almaqdan imtina etmişdi.
Bir neçə əvvəl Kosovonun baş naziri Albin Kurti sosial şəbəkədə Priştinanın Türkiyənin “Bayraktar” pilotsuz təyyarələrini aldığını açıqlamışdı. O, alınan PUA-ların fotolarını da dərc edib.
Poliqon.info