ABŞ prezidenti Co Bayden Ukraynaya yardımı sürətləndirmək üçün çərşənbə axşamı Ağ Evdə Nümayəndələr Palatasının spikeri Mayk Conson da daxil olmaqla konqres liderləri ilə görüşəcək...
Poliqon Bloomberg Agentliyinə istinadən xəbər verir ki, görüşün məqsədi müttəfiqlərə, o cümlədən Ukraynaya təcili yardım üçün milyardlarla dolların ayrılmasına nail olmaq və ABŞ hökumətinin fəaliyyətinin dayandırılmasının qarşısını almaqdır.
Ağ Evin bazar günü açıqlanan həftəlik cədvəlinə görə, Bayden milli təhlükəsizlik və hökumətin açıq saxlanması ilə bağlı ikitərəfli əlavə sənədin qəbul edilməsinin təcililiyini müzakirə edəcək.
Consonun ofisi spikerin görüşdə iştirak etməyi planlaşdırdığını təsdiqləyib. Həmçinin Senatda çoxluğun lideri Çak Şumer, azlıqların lideri Mitç Makkonnell və Nümayəndələr Palatasında azlıqların lideri Hakim Cefris də iştirak edəcək.
Baydenin milli təhlükəsizlik üzrə müşaviri Ceyk Sullivanın daha əvvəl dediyi kimi, ABŞ prezidentinin administrasiyası hesab edir ki, Senatda ikipartiyalı səsvermə ilə təsdiqlənən yardım Conson onu səsverməyə çıxararsa, Nümayəndələr Palatasında da qəbul edilə bilər. Lakin bu məsələ Conson üçün çətindir, o, Ukraynaya yardımı təsdiqləsə, spiker kimi gücü təhlükə altına düşə bilər.
Artıq bir neçə aydır - 2023-cü ilin oktyabrından ABŞ Konqresi prezident Co Bayden administrasiyasının Ukraynaya təxminən 60 milyard dollar məbləğində əlavə yardım tələbinin təsdiqini yekunlaşdıra bilmir.
Nümayəndələr Palatasının spikeri Mayk Conson müvafiq qanun layihəsini səsverməyə qoymayıb və fevralın sonuna qədər fasilə elan edib. Eyni zamanda Bayden Ukraynaya yardımı müzakirə etmək üçün Consonla görüşməyə hazır olduğunu bildirib.
Poliqon.info
Digərxəbərlər
Populyar xəbərlər
