Avropanın daxili bazar üzrə komissarı Tyerri Breton bildirib ki, Avropa İttifaqı sonradan Ukraynaya göndəriləcək mərmi istehsalının artması səbəbindən qismən müharibə iqtisadiyyatına keçib. O əlavə edib ki, avropalı siyasətçilərin diqqəti Avropa Parlamenti və ABŞ-dakı seçkilərə yönəldiyi üçün Ukrayna ordusu çətinliklərlə üzləşə bilər.
Poliqon xəbər verir ki, Avropa komissarı bu barədə BFMTV kanalında danışıb.
"İndi bizim özümüzdə seçkilər var və ABŞ-da da seçkilər tezliklə başlayacaq. Təbii ki, Rusiya üçün bu, irəliləməyə bir fürsətdir. Bu səbəbdən biz Avropada silah və sursat baxımından subsidiyalarımızı çox əhəmiyyətli dərəcədə artırmaq qərarına gəldik", deyə Breton bildirib.
Breton əlavə edib ki, Aİ Ukraynaya sonrakı təhvil vermək üçün ildə 2 milyon mərmi, o cümlədən 155 kalibrli mərmi istehsal etməyi qarşısına məqsəd qoyub. Onun sözlərinə görə, Avropanın hərbi sənayesini daha da inkişaf etdirmək və bunu daha sürətli etmək lazımdır.
Martın 15-də Avropa Komissiyası Avropa müdafiə sənayesinin inkişafı çərçivəsində sursat istehsalını artırmaq üçün 500 milyon avro ayırıb. AK-nin bəyanatında deyilir ki, bu vəsait 2025-ci ilin sonuna qədər hər il 2 milyona qədər mərmi istehsalına imkan verəcək. Aprel ayında Fransa prezidenti Emmanuel Makron müharibə iqtisadiyyatına keçidin sürətləndirilməsinin zəruriliyindən danışmışdı.
Poliqon.info