Aİ Yəmən husilərinə qarşı hərbi əməliyyata başlayacaq

Poliqon "Bild" nəşrinə istinadən xəbər verir ki, müvafiq qərarı Aİ-nin xarici işlər nazirləri verib. Xüsusilə, Almaniya artıq Yəmən sahillərinə "Hessen" freqatını göndərib, onun göyərtəsində Bundesverin 250-yə yaxın əsgəri var.

İsrailin HƏMAS-a qarşı hərbi əməliyyatına başlamasından sonra yəmənli husilər bu hərəkatın yaraqlılarına dəstək veriblər. 2023-cü ilin noyabrından İranın dəstəklədiyi husi üsyançıları Qırmızı dənizdən keçən gəmilərə hücum etməyə başlayıblar. Əvvəlcə yalnız İsraillə əlaqəli gəmilərə hücum edilsə də, sonradan digər ölkələrin, o cümlədən Amerikanın gəmiləri çarpaz atəş altına düşüb.

Xatırladaq ki, Süveyş kanalı və Qırmızı dənizdən keçən dəniz yolu Avropa ilə Asiya arasında ən qısa yoldur.

Fevralın 1-də məlum olub ki, Rusiya nefti daşıyan tankerlər husilərin maneələri ilə qarşılaşmadan Qırmızı dənizdən keçməyə davam edir.

Fevralın 2-də yəmənli husilər Böyük Britaniya və ABŞ-ın Yəmən hava limanlarına zərbələrini davam etdirəcəyi təqdirdə Qırmızı dənizdəki fiber-optik kabeli məhv edəcəkləri ilə hədələyiblər.

Poliqon.info