Avropa Xarici Fəaliyyət Xidməti Ukraynaya dəyəri 20 milyard avrodan çox olan hərbi yardımın yeni planını hazırlayıb.
Poliqon xəbər verir ki, bu barədə The Wall Street Journal qəzeti yazıb.
Bildirilir ki, Avropa planı dörd il ərzində Ukraynaya ayıracaqları on milyardlarla avro hərbi yardım müqabilində Avropa İttifaqının üzv ölkələrinə 20 milyard avrodan çox vəsaitin qaytarılmasını nəzərdə tutur. Avropa İttifaqı 2022-ci ildə yaradılmış Avropa Sülh Fondundan təxminən 6,5 milyard avro cəlb edəcək və 2024-cü ildən 2027-ci ilə qədər hər il 5 milyard avroya qədər vəsait alacaq bir fond yaratmağa hazırlaşır.
Bu fondun vəsaiti Avropa İttifaqı ölkələrinin silah alışı ilə bağlı xərclərini kompensasiya etmək, həmçinin Ukraynadan olan hərbi qulluqçuların hərbi təlim proqramının xərclərini ödəmək üçün istifadə olunacaq.
Qeyd edək ki, bundan əvvəl Avropa Komissiyasının rəhbəri Ursula fon der Leyen Ukraynaya 50 milyard avro ayrılmasının nəzərdə tutulduğunu bildirib. Lakin hələlik Macarıstan bu yardıma qarşı çıxır. Yanvarın 19-da Yunanıstanın baş naziri Kiriakos Mitsotakis Avropa Şurasının Ukraynaya yardım göstərməkdə Macarıstanın maneələrini dəf edəcəyi və razılığa gələ biləcəyini deyib.
Poliqon.info