Aİ Moldova və Gürcüstanı münaqişələr həll edilmədən üzvlüyə qəbul edə bilər

Poliqon xəbər verir ki, bu barədə Avropa İttifaqının xarici siyasət xidmətinin rəsmi nümayəndəsi Piter Stano bildirib.

"Gürcüstan və Moldovanın Avropa gələcəyi münaqişələrin girovu ola bilməz. Bu, Avropa İttifaqının ən yüksək səviyyəsində təsdiqləndi", deyə Stano "İzvestiya"ya açıqlamasında qeyd edib.

O, Avropa İttifaqının bu ölkələrin ərazi bütövlüyünü və suverenliyini dəstəklədiyini vurğulayıb.

Noyabrın 8-də Avropa Komissiyası Moldova və Ukrayna üçün Avropa İttifaqına daxil olmaq üzrə danışıqlara başlamağı tövsiyə edib. Gürcüstana Avropa İttifaqına üzv olmaq üçün namizəd statusunun verilməsi tövsiyə olunur. Daha sonra Moldova prezidenti Maya Sandu bildirib ki, ölkənin Avropa İttifaqına daxil olması üçün "ən pis ssenari" qismən inteqrasiya olacaq: əvvəlcə Dnestr çayının sağ sahili, sonra isə Dnestryanı əraziyə daxil ola bilər.

Həmçinin Gürcüstan Avropaya inteqrasiya istiqamətində növbəti addımlarını açıqlaylıb. Gürcüstan parlamentinin spikeri Şalva Papuaşvili müxalifəti və vətəndaş sektorunu planın hazırlanmasında iştirak etməyə çağırıb. Papuaşvilinin fikrincə, bu halda Gürcüstan Avropa İttifaqına üzv olmağa namizəd statusu almaq üçün lazım olan nəticələrə nail olacaq.

Gürcüstan və Moldova 2022-ci ilin martında Avropa İttifaqına üzv olmaq üçün ərizə verib. Ukrayna 2022-ci ilin fevralında Avropa İttfaqına müraciət edib.

Poliqon.info