Ukrayna prezidenti Vladimir Zelenski ABŞ-ın keçmiş prezidenti Donald Trampla Rusiya-Ukrayna münaqişəsinin sülh yolu ilə həlli üçün təklif etdiyi planı müzakirə etməyə hazır olduğunu bildirib...
Poliqon xəbər verir ki, Ukrayna prezidenti bu barədə Fox News telekanalının müxbiri ilə söhbətində bildirib. Eyni zamanda Zelenski vurğulayıb ki, ukraynalılar Amerikanın eks-prezidentinin bütün təklifləri ilə razılaşmayacaqlar.
Qeyd edək ki, Fox News telekanalının müxbiri Benjamin Hall Kiyevə gəlib və orada Vladimir Zelenski ilə görüşüb. Hall Ukrayna prezidentinə xatırladıb ki, Donald Tramp Rusiya-Ukrayna münaqişəsinə 24 saat ərzində son qoyacağına söz verib.
“Gəlin onunla danışaq və ona sülh düsturunda hansı addımların olduğunu göstərməyə imkan verək”, deyə Ukrayna prezidenti cavabında bildirib. ABŞ-ın keçmiş prezidenti ilə görüşməyə və onun təkliflərini müzakirə etməyə hazır olub-olmadığını soruşduqda, Zelenski belə cavab verib: “Mən hazıram. Təbii ki, onun aydın sülh planı varsa, mənimlə bölüşə bilər”.
Zelenski Donbas və Krım Rusiyaya verilərsə, döyüşlərin dayandırıla biləcəyi ilə razılaşıb. Lakin Ukrayna prezidenti vurğulayıb ki, onun fikrincə, ukraynalılar belə bir sülh planına razı olmayacaq.
Qeyd edək ki, Donald Tramp dəfələrlə bildirib ki, Rusiya-Ukrayna münaqişəsinə 24 saat ərzində son qoya bilər. O, həmçinin Avropa müttəfiqlərini Ukraynaya daha çox pul xərcləməyə razı sala biləcəyini də bildirib. Vladimir Zelenski isə Rusiya ilə münaqişəni 24 saat ərzində bitirməyin mümkünsüzlüyünü izah etmək üçün Trampı Ukraynaya gəlməyə dəvət edib. ABŞ-ın keçmiş prezidenti bundan imtina edib.
Poliqon.info