Ukrayna PUA-ları artıq Putinin iqamətgahı yaxınlığında yerə düşürlər…

Poliqon.info xəbər verir ki, çərşənbə axşamı pilotsuz təyyarə Kolomna yaxınlığında, Moskvadan təxminən 75 kilometr aralıda yerləşən “Qazprom” stansiyasının yaxınlığında qəzaya uğrayıb.

Başqa bir pilotsuz təyyarə isə Putinin Soçidəki iqamətgahından təxminən 70 km aralıda yerləşən Tuapsedəki neft emalı zavoduna qədər uçub. Ümumiyyətlə bu gün müharibə başlayandan bəri Rusiya ən böyük dron hücumu ilə üzbəüz qalıb. Dronlar Rusiyanın beş vilayətində müxtəlif obyektlərə zərbələr endirib.

Çərşənbə axşamı Belqorod, Bryansk, Moskva vilayətləri, Krasnodar diyarı və Adıgeyə pilotsuz təyyarələrin zərbələri endirilib. Bundan başqa, Sankt-Peterburqda da hava məkanı bağlanıb və qırıcılar havaya qaldırılıb.

Tuapsedə Rusiyanın Qara dəniz sahilindəki yeganə neft emalı zavodu olan “Rosneft”in neft emalı zavodu pilotsuz təyyarə ilə vurulub. Bundan əlavə, Tuapsedən bir qədər uzaqda, Soçidə Vladimir Putinin “Boçarov Ruçey” iqamətgahı yerləşir. Bu iqamətgah pilotsuz təyyarənin düşdüyü yerdən təxminən 70 kilometr aralıdadır. Qəza yerindən təxminən 130 km məsafədə isə Rusiya Qara dəniz donanmasının bazası olan Novorossiysk yerləşir.

ABŞ ordusunun veteranı, OSINT analitiki Henri Şlottman bildirib ki, Tuapsedən bir neçə görüntü hücumlarda İsraildə hazırlanmış, lakin başqa ölkələrdə də istehsal olunan Aerostar taktiki pilotsuz təyyarəsindən istifadə olunduğunu göstərir. Ancaq məsələ ondadır ki, həmin dronlar partlayıcı daşımır. Analitik ona da diqqəti çəkib ki, Tuapsedən bəzi videolarda reaktiv mühərrikin səsi eşidilir: “Bu, başqa bir dron daola bilər, məsələn, modernləşdirilmiş Tu-141 və ya buna bənzər bir cihaz”, deyə Henri Şlottman qeyd edib.

Daha bir pilotsuz təyyarə Moskva vilayətinin Kolomna rayonunda - Qubastovo kəndi yaxınlığında, “Qazprom” stansiyasının yaxınlığında qəzaya uğrayıb. “Baza” Telegram kanalı xəbər verir ki, qurğu partlamadan yerə düşüb, o, Moskva vaxtı ilə saat 11-də aşkar edilib. Qəzaya düşən aparat qaz kompressor stansiyasından 100 metr aralıda tapılıb, onun düşməsi obyektin işinə mane olmayıb, deyə Telegram kanalı yazıb.

TASS hüquq-mühafizə orqanlarına istinadən xəbər verir ki, Kolomna yaxınlığında yerə düşən pilotsuz təyyarənin xarici aparat olduğu üzə çıxıb. Çox güman ki, bu, Ukraynanın “Ukrjet” şirkəti tərəfindən 2020-ci ildən istehsal edilən UJ-22 Airborne model drondur,

“Shot” kanalı yerə düşən pilotsuz təyyarənin fotosunu dərc edib. Onlar cihazın üzərində “UJ-22” yazıldığını qeydə alıblar. Bu PUA-nın maksimal uçuş məsafəsi 800 kilometrdir, saatda 160 kilometrə qədər sürətə çatır, 6 kilometrə qədər yüksəklikdə uça bilir və 20 kiloqrama qədər yük daşıya bilir.

Şlottman Agentliyə bildirib ki, UJ-22 Airborne 20-30 kiloqram partlayıcı daşıya bilir, lakin fotoda heç bir sursat görünmür. Onun fikrincə, dron partlayıcı maddə daşımasaydı, o zaman sonrakı hücumlar üçün kəşfiyyat apara bilərdi. Kolomna yaxınlığında, ekspert deyir ki, zərbələr üçün çoxlu hədəf yoxdur, lakin şəhərin cənubunda sursat anbarı (63184 saylı hərbi hissə), cənub-şərqdə isə strateji hərbi rabitə obyekti olan Luxovitsı-3 var.

Kolomnada “Qazprom” stansiyasından əlavə Müdafiə Nazirliyinin Pilotsuz Aviasiya Mərkəzi fəaliyyət göstərir. Bu mərkəz hüquq-mühafizə orqanlarında və mülki idarələrdə PUA-ların istifadəsi, PUA bölmələri üçün mütəxəssislərin hazırlanması, həmçinin pilotsuz təyyarələrin hərbi sınaqlarına cavabdehdir.

OSINTtechnical layihəsi bildirir ki, Belqorod bölgəsinə düşən pilotsuz təyyarənin fotoşəkillərində dağıntılar arasında Britaniya istehsalı olan bir cüt L22A1 PE8 partlayıcı yükü görünür.

CIT-in təsisçisi Ruslan Leviev Maykl Nakinin kanalında qeyd edib ki, dronlar əvvəllər Rusiyanın neft anbarlarına və neft anbarlarına hücum ediblər. O qeyd edib ki, bu cür hücumlar məntiqlidir, onların məqsədi yanacağın tədarükünü pozmaqdır. Ekspert onu da istisna etmir ki, Ukrayna Silahlı Qüvvələri Belqorod istiqamətində ən ucuz və sadə pilotsuz təyyarələr buraxaraq, Rusiya hava hücumundan müdafiə sisteminin necə işləməsini öyrənir və Rusiyanın hava hücumundan müdafiə sistemini sınaqdan keçirə bilər.

Sankt-Peterburq isə səmadakı naməlum obyektə görə hava məkanı təxminən bir saat bağlanıb. Daha sonra Müdafiə Nazirliyi şəhər üzərində “Hava Hücumundan Müdafiə Qüvvələrinin hazırlığını” elan edib.

Qeyd edək ki, bundan əvvəl Moskvaya ən yaxın uçan pilotsuz təyyarə fevralın 6-da Kaluqa üzərində səmada partlayıb. Partlayış paytaxtdan təxminən 150 kilometr aralıda baş verib.

Tərcümə Poliqon-a aiddir

Poliqon.info