Tərtərdə növbəti dəfə vətəndaşların müraciətləri dinlənilib - Fotolar

Tərtər Rayon İcra Hakimiyyətinin başçısı Müstəqim Məmmədov növbəti dəfə vətəndaşları qəbul edib. Qəbulda 45 nəfər vətəndaşın müraciəti dinlənilib. Şəhid ailələri və qazilər növbədənkənar qəbul edilib, onların problemlərinə həssaslıqla yanaşılıb.

PİA.az xəbər verir ki, qəbula gələn vətəndaşlar əsasən Vətən müharibəsi zamanı evlərinə dəymiş ziyana görə şirkətlər tərəfindən görülən təmir-bərpa işlərinin düzgün aparılmaması, işlə təmin olunma, sahibkarlıq üçün torpaq sahəsinin ayrılması, bələdiyyədən icarəyə götürülmüş torpaq sahəsinin sənədləşdirilməsi, özünüməşğulluq proqramı çərçivəsində heyvanla təmin olunma, mənzil növbəsinin tezləşdirilməsi, həyətyanı və pay torpaq sahəsinə gedən yolun zəbt olunması, pay torpaq sahələrinin suvarılması, müalicə və dərmanlarla təminat, şəhid adının əbədiləşdirilməsi və bulağın ətrafının abadlaşdırılması, maddi yardım və digər problemlərlə bağlı müraciət ediblər. Onların müraciətləri rayon rəhbəri tərəfindən diqqətlə dinlənilib, icra hakimiyyətinin səlahiyyətlərinə aid müraciətləri qanun çərçivəsində həll olunub, əsassız müraciətlərlə bağlı isə vətəndaşlara izahatlar verilib, qəbulda vətəndaş məmnunluğu təmin olunub.

Qəbulda vətəndaşlar ölkəmizdə həyata keçirilən islahatlara, əhalinin sosial rifah halının yüksəldilməsinə göstərilən diqqət və qayğıya görə möhtərəm Prezident cənab İlham Əliyevə və Birinci vitse-prezident Mehriban xanım Əliyevaya öz minnətdarlıqlarını bildiriblər.