Tbilisidə azərbaycanlı sahibkarı güllələyən şəxs saxlanılıb - Yenilənib

APA-nın Tbilisi müxbiri xəbər verir ki, bu barədə Gürcüstan Daxili İşlər Nazirliyinin yerli mətbuata açıqlamasında bildirilib.

Qeyd olunub ki, faktla bağlı Gürcüstan Cinayət Məcəlləsinin 108-ci (qəsdən adam öldürməyə cəhd) maddəsi ilə cinayət işi açılıb.

***

Tbilisidəki “Lilo Mall” ticarət mərkəzində silahlı hücuma məruz qalan iş adamı etnik azərbaycanlı Roman İsayevdir.

APA-nın Tbilisi müxbiri xəbər verir ki, bu barədə “TV Pirveli” məlumat yayıb.

Bildirilib ki, başından güllə yarası almış biznesmen xəstəxanaya çatdırılıb, həkimlər onun vəziyyətini ağır qiymətləndirirlər. Roman İsayevin süni tənəffüs aparatına qoşulduğu bildirilir.

Məlumata görə, silahlı şəxs ticarət mərkəzində tekstil mağazasının sahibi olan Roman İsayevdən söhbət etmək üçün küçəyə çıxmasını istəyib, lakin sonuncu buna rədd cavabı verib. Bundan sonra şübhəli atəş açaraq onu yaralayıb və daha sonra ərazidən qaçıb.

Polisin hazırda cinayətkarı axtardığı, yaralama anının təhlükəsizlik kamerasına düşdüyü bildirilib.

Faktla bağlı cinayət işi açılıb.

***

Gürcüstanın paytaxtı Tbilisidə fəaliyyət göstərən “Lilo Mall” ticarət mərkəzində silahlı insident baş verib.

APA-nın Gürcüstan bürosu yerli KİV-ə istinadən xəbər verir ki, hadisə nəticəsində iş adamı güllələnib. Onun xəstəxanaya çatdırıldığı, şübhəlinin isə ərazidən qaçdığı bildirilib. Hadisə yerinə hüquq mühafizə orqanlarının əməkdaşları səfərbər ediliblər.

İnsidentin motivləri hələki məlum deyil. Faktla bağlı istintaq başladılıb.

Poliqon.info