Sistanidan İraq Baş Nazirinə xəbərdarlıq: “İrandan uzaq durun!”

İraqlı tanınmış din xadimi Sistani ölkə rəsmilərinə müraciət edərək, onlardan İrandan uzaq durmalarını tələb edib.

İraq yerli media orqanlarının məlumatına əsasən, bir neçə gün öncə Sistani öz yaxın adamı olan sabiq deputat Əlbülhadi Əl-Həkimi ölkə rəhbərlərinin yanına göndərib. Baş Nazir Adil Əbdülmehdi, prezident Bərhəm Salih və parlamentin spikeri Mehdi Əl-Həlbusi ilə görüşən Əl-Həkim onlara Sistaninin mesajını çatdırıb.

İraqın qeyd edilən siyasi liderləri Əl-Həkim ilə görüşdən sonra yaydıqları bəyanatda yalnız aparılmış müzakirələrin ümumi məzmununu açıqlamaqla kifayətləniblər. Onlar Sistaninin mesajının nədən ibarət olduğu barədə detalları açıqlamayıblar.

İraqın adının açıqlanmasını istəməyən rəsmilərindən birinin “Əl-Ərəbi Əl-Cədid” agentliyinə dediklərinə görə, Əl-Həkim Sistanidən rəsmilərə maraq doğuran mesajlar çatdırıb, hansı ki, onlardan ən mühümü Baş Nazirə veriləndir.

Bu xəbərdarlığın həm də İraqda İranın himayə etdiyi şiə yaraqlılarına da mesaj olduğu bildirilir. Lakin onların bu xəbərdarlığa əməl edib- etməyəcəkləri məlum deyil.

Digər tərəfdən, iraqlı millət vəkili Fəttah Əl-Şeyx də İranla yaxın münasibətləri olan siyasətçilərə müraciət edərək, onları ayıq və ehtiyatlı olmağa, eləcə də ölkəyə yaxşı sonluq bəxs etməyəcək məsələlərdən və rəsmi Tehrandan uzaq durmağa çağırıb.

pia.az