Çinin 40 ilə yaxın davam edən və ölkəni dünyanın ən böyük iqtisadiyyatlarından birinə çevirən iqtisadi artım prosesi sona çatıb...
Poliqon xəbər verir ki, bu barədə The Wall Street Journal nəşrinin iqtisadi müşahidəçiləri Linlin Vey və və Stella İfan Senin yazdıqları məqalədə bildirilir.
Ekspertlər yazır ki, onilliklər ərzində iqtisadiyyatın bərpası və inkişaf tempi Çin hakimiyyətinə ölkənin hər yerində zavodların, göydələnlərin və yolların tikintisinə sərmayə qoymağa imkan verib.
“Bu model Çini yoxsulluqdan çıxaran və ixrac qabiliyyəti bütün dünyaya yayılan qlobal nəhəngə çevirən qeyri-adi böyümə dövrünü başlatdı. Lakin bu gün bu iqtisadi model özünü tükədib”, deyə WSJ ekspertləri yazır.
Analitiklər qeyd edir ki, Pekinin infrastrukturunu genişləndirmək üçün imkanları və resursları tükənir. Çünki bu sərmayələr çox vaxt düzgün istiqamətə qoyulmayıb və bu gün Çinin bəzi vilayətlərində inşa edilən körpülərdən və hava limanlarından demək oar ki, istifadə olunmur. Böyük şəhərlərdə tikilən milyonlarla mənzil boşdur və demək olar ki, bütün sahələrdə investisiya gəliri kəskin şəkildə aşağı düşüb.
Politico nəşri isə yazır ki, Pekin ABŞ-ın ticarət naziri Gina Raimondonun Çinə səfəri zamanı yardım üçün Birləşmiş Ştatlara müraciət edə bilər. Nəşr yazır ki, Çinin iqtisadi problemləri ixracın və xarici investisiyaların azalması səbəbindən yaranıb. Gənclər arasında işsizlik isə artmaqdadır. Analitiklər hesab edirlər ki, “bir vaxtlar qarşısıalınmaz iqtisadi nəhəng nəhayət böyük bir çuxura düşüb”.
Ekspertlərin fikrincə, ABŞ ticarət nazirinin Çinə səfəri zamanı vəzifəsi Amerika ixracını təşviq etmək olacaq. Pekin də öz növbəsində Vaşinqtonun tətbiq etdiyi məhdudiyyətləri yumşaltmağa çalışacaq.
Qeyd edək ki, ötən ilin oktyabrında ABŞ Çinə müasir yarımkeçiricilərin ixracına nəzarəti gücləndirib, bu ilin avqustunda isə Çin iqtisadiyyatının müəyyən sektorlarına investisiya qoyuluşunu məhdudlaşdırıb.
Poliqon.info
Digərxəbərlər
Populyar xəbərlər
