Haniyənin ölümü: Şahid hadisənin təfərrüatını danışdı

Oxu.Az xəbər verir ki, bu barədə "RIA Novosti"yə müsahibəsində Fələstinin HƏMAS hərəkatının İrandakı nümayəndəsi və baş verənlərin şahidi Xalid əl-Qəddumi danışıb.

O, Haniyə ilə eyni evdə, lakin iki mərtəbə aşağıda gecələyib.

"Təxminən saat 1:37-də sanki binaya nəsə dəydi. Mən düşündüm ki, bəlkə zəlzələ olub və ya şimşək çaxıb. Amma ağlıma gəlmədi ki, bu, qətl ola bilər", - deyə əl-Qəddumi xatirəsini bölüşüb.

Onun sözlərinə görə, otaqdakı hamam dağılıb, tüstü görünüb. Əl-Qəddumi nə baş verdiyini soruşmaq üçün küçəyə çıxanda ona Haniyənin öldüyünü bildiriblər. 25 dəqiqədən sonra ona HƏMAS liderinin otağına getməyə icazə verilib. Otaq dördüncü mərtəbədə yerləşib, iki xarici divar dağılıb və içəri çöküb. Bütün otaq dağıntılarla dolu olub, Haniyənin cəsədinin bir hissəsi dağıntıların altında olub. Qonşu otaqda Haniyənin mühafizəçisinin cəsədi olub.

Əl-Qəddumi qeyd edib ki, İran Prezidenti Məsud Pezeşkianın andiçmə mərasimindən sonra, qətlin baş verdiyi gün axşam Haniyə siyasətçi ilə birlikdə şam yeməyi yeyib. Ölümündən əvvəlki son saatlarda o, HƏMAS nümayəndə heyətinin digər üzvləri ilə Livanın "Hizbullah" hərəkatının komandiri Fuad Şükürün ölümünü müzakirə edib. Binaya raket düşəndə isə Haniyə yuxulu olub.

Xatırladaq ki, iyulun 31-də İsmayıl Haniyə Tehranda gecələdiyi evə raketin birbaşa düşməsi nəticəsində öldürülüb. O, ölkənin yeni Prezidenti Məsud Pezeşkianın andiçmə mərasimində iştirak etmək üçün İrana gedib.

Poliqon.info