Venesuelada prezident seçkilərində səsvermənin nəticələri ABŞ-ın öyrəndiyi müstəqil məlumatlarla üst-üstə düşmür və buna görə də Vaşinqton Latın Amerikası ölkəsinə qarşı sanksiyaları ləğv etməyəcək və yeni sanksiyalar tətbiq edə bilər...
Poliqon xəbər verir ki, bu barədə Reuters və Bloomberg Agentlikləri Amerika prezidenti Co Bayden administrasiyasının yüksək vəzifəli rəsmilərinə istinadən məlumat yayıblar.
Xatırladaq ki, iyulun 29-da Venesuela prezidenti Nikolas Maduronun qərargahı seçkilərdə onun qələbəsini elan edib. Müxalifət siyasətçinin qələbəsini tanımayıb və müxalifətin namizədi Edmundo Qonzalesi qalib elan edib. Müxalifət lideri Mariya Korina Maçado ordu qarşısında çıxış edərək Maduronun devrilməsinə çağırıb.
Bloomberg-in məlumatına görə, Edison Research (ABŞ) tərəfindən keçirilən exit-poll Edmundo Qonzalesin 30 faiz üstünlüklə qalib gəldiyini göstərib. Eyni zamanda, Hinterlaces kimi yerli firmalar öz exit-polllarında Maduronun liderliyini elan ediblər.
Reuters həmçinin qeyd edir ki, Bayden administrasiyası Maduroya təfərrüatlı səslər cədvəlini açıqlamaq üçün təzyiqi artırmaqda israr edəcək, əks halda beynəlxalq ictimaiyyət elan edilmiş nəticələri qəbul etməyə razı olmayacaq.
Poliqon.info