Ərəb ölkələri Qəzza ilə bağlı yeni qətnamə hazırlayır

Poliqon xəbər verir ki, Fələstinin BMT-dəki daimi müşahidəçisi Riyad Mənsur ərəb ölkələrinin Qəzza zolağına humanitar yardım məsələsi ilə bağlı BMT Təhlükəsizlik Şurasına qətnamə layihəsi hazırlamaq niyyətindən danışıb. Daimi nümayəndənin sözlərinə görə, layihə humanitar təşkilatlara, o cümlədən UNRWA-ya Qəzza zolağının istənilən hissəsinə risk olmadan humanitar yardım göndərmək imkanı verəcək.

“Bu gün və sabah BMT Təhlükəsizlik Şurasında fəal danışıqlara başlayacağımız qətnamə layihəsi yük maşınlarının birdən çox keçid məntəqəsindən keçməsinə icazə tələb edəcək. Humanitar yardım təkcə Rəfahdan deyil, Qəzzadakı bütün nəzarət-buraxılış məntəqələrindən, xüsusən də yük maşınlarını yoxlamaq üçün texnologiyaya malik olan məntəqələrdən keçməlidir”, deyə Riyad Mənsur bildirib.

Qeyd edək ki, dekabrın 10-da Qəzza zolağının Səhiyyə Nazirliyi hərbi əməliyyatlar nəticəsində həlak olan fələstinlilərin sayının 18 minə yaxın, yaralıların sayının isə 49,5 min nəfər olduğunu bildirib. BMT-nin Baş katibi Antonio Quterreş bildirib ki, bu anklava humanitar yardım çatdırmaq demək olar ki, mümkün deyil. O, BMT Təhlükəsizlik Şurasını Qəzzada atəşkəsə nail olmağa çağırıb.

Xatırladaq ki, bundan əvvəl qətnamə layihəsinə səsvermə keçirilməzdən bir gün əvvəl ABŞ sənədi bloklayıb. Dekabrın 12-də BMT Baş Assambleyası Misir və Mavritaniyanın təqdim etdiyi sektorda atəşkəsə çağıran qətnamənin qəbul edilməsinə səs verib. İsrail, ABŞ və Avstriya da daxil olmaqla, 10 ölkə qətnamənin əleyhinə səs verib.

Poliqon.info