Qazaxıstanın keçmiş prezidenti Nazarbayevin kiçik qardaşı vəfat edib

Poliqon xəbər verir ki, bu barədə Qazaxıstanın keçmiş rəhbərinin mətbuat katibi Aidos Ukibay açıqlayıb. Mərhum 70 yaşında olub.

“Qazaxıstan Respublikasının birinci prezidenti Nursultan Nazarbayevin kiçik qardaşı Bolat Nazarbayev 70 yaşında uzun sürən xəstəlikdən sonra vəfat edib”, deyə Aidos Ukibay X (keçmiş Twitter) sosial şəbəkəsindəki hesabında bildirib. Bolat Nazarbayev bu gün, noyabrın 13-də Almatı Mərkəzi Klinik Xəstəxanasında dünyasını dəyişib.

365info.kz portalının məlumatına görə, Bolat Nazarbayev təkrar miokard infarktı şübhəsi ilə xəstəxanaya yerləşdirilib. “Express K” portalının yazdığına görə isə ona xəstəxanada pnevmoniya və trombozla ağırlaşan qırtlaq xərçəngi diaqnozu qoyulub.

Bolat Nazarbayev Şamalgan sovxozunun direktor müavini, Kaskelendəki çörək zavodunun direktor müavini olub. Xırdabuynuzlu heyvanların dərilərinin satışı sahəsində bizneslə məşğul olub. O, “İnkar Aqro” tərəfdaşlığının vitse-prezidenti olub, 1997-ci ildə “BN İnvest” holdinqinin direktoru olub.

2016-cı ildə aztəminatlı həmvətənlərə dəstək olmaq üçün xeyriyyə fondu təsis edib. Bu fond prezident Kasım-Jomart Tokayevin 2022-ci ilin əvvəlində ölkədə genişmiqyaslı etirazlar başa çatdıqdan sonra yaratmağı təklif etdiyi “Qazaxıstan Xalqı” fonduna 1 milyard tenge (175,2 milyon rubl) köçürüb.

Newsshub xəbər verir ki, son iki il ərzində özəlləşdirmənin nəticələrinə baxmaq üçün məhkəmə proseslərində Bolat Nazarbayevin adı hallanır. Fevralın əvvəlində Bolat Nazarbayevin şirkətlərinə məxsus 299 hektar torpaq müsadirə edilib.

Ötən ilin oktyabrında Almatı məhkəməsi Bolat Nazarbayevin özəlləşdirdiyi “Baris IV” bazarını dövlət mülkiyyətinə qaytarıb. Məhkəmə müəyyən edib ki, Bolat Nazarbayev topdansatış bazarını qanunsuz olaraq bazar qiymətindən beş dəfə ucuz qiymətə alıb.

Poliqon.info