“Hayastan” fraksiyasından olan deputat Artur Xaçatryan Ermənistanın Rusiya ilə gərgin münasibətlərindən narahatlıq ifadə edib...
“Ermənistan hökuməti bu faktı necə gizlətməyə və ya hər şeyin qaydasında olduğunu göstərməyə çalışsa da, Ermənistanla Rusiya arasında münasibətlər kifayət qədər gərgindir”.
Poliqon xəbər verir ki, bunu jurnalistlərə “Hayastan” fraksiyasından olan deputat Artur Xaçatryan deyib.
“Bəlkə də yanılıram, amma mənim yaddaşımda indiyədək Ermənistan səfirinin Xarici İşlər Nazirliyinə çağırılması və etiraz notası verilməsi halı olmayıb”, deyə Xaçatryan bildirib.
Onun fikrincə, indiki şəraitdə Rusiya Federasiyası ilə münasibətlərin korlanması kifayət qədər riskli addımdır:
“Sülhməramlılar və onların fəaliyyətinin keyfiyyəti ilə bağlı suallar var, lakin bu, əsas həqiqəti inkar etmir”.
Deputat Moskva ilə münasibətlərdəki gərginliyi İrəvanın xarici siyasət vektorunun dəyişməsinin nəticəsi hesab edir. Eyni zamanda, o, Ermənistanın sərhədlərinin qorunması və Qarabağ ermənilərinin təhlükəsizliyinin təmin edilməsi məqsədilə regiona silahlı kontingent göndərməyə digər xarici aktorlar arasında hər hansı bir hazırlıq görülmədiyini bildirib.
“Ermənistan rəhbərliyinin nəzəri Qərbə yönəlib, orada təhlükəsizlik mənbəyi axtarır, amma başa düşmək lazımdır ki, Türkiyə Ermənistanın qərbində yerləşir. Fransa deyil, başqa ölkələr deyil, məhz Türkiyə”, deyə Xaçatryan qeyd edib.
Poliqon.info