ABŞ YUNESKO-ya qayıtmaq qərarına gəlib...

ABŞ hakimiyyəti keçən həftə Birləşmiş Millətlər Təşkilatının Təhsil, Elm və Mədəniyyət üzrə Təşkilatına (YUNESKO) yenidən qoşulmaq qərarına gəldikləri barədə məlumat veriblər...

Polqion xəbər verir ki, bu barədə iyunun 11-də ABŞ Dövlət Departamentinin nümayəndəsi Axios nəşrinə bildirib.

Nəşr qeyd edir ki, ABŞ təxminən altı il əvvəl YUNESKO-ya üzvlüyünü dayandırıb. Bu qərarı Ağ Evin keçmiş rəhbəri Donald Tramp verib. O, buna səbəb kimi təşkilatın “anti-İsrail qərəzliliyini” göstərib. Az sonra İsrail YUNESKO-dan çıxmaq niyyətində olduğunu açıqlayıb.

2022-ci ilin fevralında İsrail hökuməti ABŞ-ın YUNESKO-ya qaytarılmasına etiraz etməyəcəyi barədə Dövlət Departamentini xəbərdar edib.

Bundan əvvəl 1984-cü ildə prezident Ronald Reyqanın dövründə ABŞ artıq bir dəfə YUNESKO-dan çıxıb və yenidə təşkilata üzvlüyünü bərpa edib. Çıxışa səbəb isə YUNESKO-nun “həddindən artıq siyasiləşdirilməsi” və büdcənin “məntiqsiz xərclənməsi” göstərilib. Birləşmiş Ştatlar təşkilata yalnız 2003-cü ildə prezident Corc Buşun dövründə qayıdıb.

Qeyd edək ki, YUNESKO-nun məqsədi dövlətlər və xalqlar arasında təhsil, elm və mədəniyyət sahəsində əməkdaşlığı genişləndirməklə sülhün və təhlükəsizliyin möhkəmləndirilməsinə kömək etməkdir. Təşkilat 1945-ci ildən fəaliyyət göstərir.

Poliqon.info