Rusiya 2023-cü ildə neft hasilatını azaldacaq

PİA.az xəbər verir ki, bu barədə “Открытие” Bankın İdarə Heyətinin sədri Mixail Zadornov RBC-ya müsahibəsində bildirib. O, bu azalmanı Aİ ölkələrinin dekabrın 5-dən tətbiq etdiyi və Rusiyanın büdcəsinə və iqtisadiyyatına əhəmiyyətli dərəcədə təsir edəcək embarqonun təsiri ilə izah edib.

“Rusiya neftinin hara çatdırılacağı da bəlli deyil. Nefti kim daşıyacaq, Avropadan və digər qeyri-dost ölkələrdən neft axınının Asiya bazarlarına yönləndirilməsinin öhdəsindən gəlmək mümkün olub-olmayacağını kim sığortalayacaq? Bu suallar gələn il ÜDM artımı və tədiyə balansının artımı baxımından əsas məsələdir”, deyə Zadornov bildirib.

Qeyd edək ki, 2021-ci ildə Rusiya neftinin və neft məhsullarının dünya bazarına ümumi ixracının 68-70%-i Aİ və G7 ölkələrinin payına düşüb. Rusiya indi qeyri-dost ölkələr olaraq adlandırdığı ölkələrə 214,7 milyon ton neft satıb və ümumilikdə 109,5 milyard dollar qazanc götürüb. Federal Gömrük Xidmətinin məlumatlarına əsasən, ötən il xam neft və neft məhsulları Rusiya mallarının ümumi ixracından gələn gəlirin 37%-ni təşkil edib.

Bir müddət əvvəl Rusiyanın enerji eksperti Dmitri Skryabin bildirmişdi ki, sanksiyalar gündəliyi və qlobal mühit 2023-cü ildə Rusiyada neft hasilatına təsir edəcək əsas amillər olacaq. O, həmçinin qeyd edib ki, Qərbin anti-Rusiya ritorikası qarşısında Moskvanın qara qızıl üçün yeni bazarlar tapmaq bacarığından çox şey asılıdır. Ona görə də gələn il Rusiyada neft hasilatının həcmi ilə bağlı proqnozlar vermək hələ tezdir.

pia.az