İngiltərədə aktivistlər Nusretin restoranına basqın etdi

PİA.az Türkiyə mətbuatına istinadla xəbər verir ki, heyvan hüquqları müdafiəçisi “Animal Rebellion” təşkilatının üzvləri Nusret Gökçeyə məxsus Londonun mərkəzində yerləşən “Nusr-Et” restoranına basqın ediblər.

Əvvəlcədən ayrılmış masalara oturaraq restorana qarşı etiraz edən və “Nusr-Et”i korrupsioner sistemin simvolu olduğu üçün hədəf aldıqlarını bildirən etirazçılar təxminən bir saat sonra “Nusr-Et” işçiləri tərəfindən restorandan qovulublar.

Aktivist qrupun bəyanatında bitki əsaslı qida sisteminə çağırış edilib. “Animal Rebellion” üzvü Ben Tomas “Nusr-Et”ə etdikləri basqın haqqında deyib:

“Bu kimi restoranlar pozulmuş sistemin simvoludur. Hazırda İngiltərədə 2 milyon insan yemək banklarına güvənir, məşhur aşpazlar isə 1000 funt sterlinqdən artıq qiymətə qızıl örtüklü steyk satırlar”.

Metropolitan polisi bildirib ki, etiraz aksiyası barədə məlumat verilib, lakin məmurlar göndərilməmişdən qrup əvvəl restoranı tərk edib.

“Animal Rebellion” qrupunun üzvləri “Nusr-Et”dən sonra eyni gün Mançesterdəki Mişelin ulduzlu “Mana” restoranında da oxşar etiraz aksiyası keçiriblər.

Mançester polisi bildirib ki, 14 nəfər ağır cinayətdə şübhəli bilinərək saxlanılıb və əlavə istintaqa qədər zaminlə sərbəst buraxılıb. “Mana” restoranından verilən açıqlamada etirazçıların Covid-19 və davam edən enerji böhranından iqtisadi olaraq zərər çəkən kiçik bir müəssisənin fəaliyyətini pozduqları ifadə edilib.

Sözügedən məkanın sahibi Simon Martin: “Etirazçıların niyə korporativ fast-food zənciri əvəzinə, davamlılığa və heyvanların rifahına üstünlük verən bir restoranı seçdikləri ilə bağlı çaşqınlıq yaşadıq”, deyib.

pia.az