"Neftçi" komandası Gürcüstanın paytaxtı Tbilisidə "Dinamo" ilə keçirdiyi UEFA Çempionlar Liqasının I təsnifat mərhələsinin ilk oyununda qalib gəlib.
"Report"un görüşü canlı izləyən əməkdaşının məlumatına görə, Boris Payçadze adına "Dinamo Arena"da təşkil olunmuş qarşılaşmada Azərbaycan klubu 2:1 hesablı qələbə qazanıb.
Görüşü stadionun ümumi tutumunun 40 faizi qədər, yəni 22 minədək tamaşaçının izləmək imkanı olsa da, görüşə maraq elə də yüksək səviyyədə olmayıb. Cəmi 5 000-dək azarkeş arasında azərbaycanlılar da yer alıb. Onların sayı 100-dək olub.
"Neftçi" meydana 3 - 5 -2 taktiki düzülüşü ilə çıxıb. Qapıçı Aqil Məmmədovun önündə mərkəz müdafiəçiləri qismində Voislav Stankoviç, Mamadu Mboc və Mert Çelik qərarlaşıb. Yarımmüdafiənin cinahlarında Yusuf Laval və yeni transfer Harramiz Suareş, mərkəzdə isə Sabir Buqrin, Mamadu Kane və kapitan Emin Mahmudov yer alıb. Hücum xətti isə Namik Ələskərov və daha bir yeni transfer Sezar Meza Kolliyə tapşırılıb.
Görüşün ilk yarısı meydan sahiblərinin aşkar üstünlüyü şəraitində keçib. "Dinamo"nun çoxsaylı hücumlarının qarşısını Aqil Məmmədov dəfələrlə almağı bacarıb. "Neftçi" isə daha çox əks-hücumlara bel bağlayıb. İlk qol da məhz belə hücumdan sonra vurulub. 23-cü dəqiqədə zərbə mövqeyinə çıxan Ələskərov rəqib qapıçı Roin Kvasxvadzenin önə çıxmasından yararlanaraq, topu onun başı üzərindən tora göndərib.
Buraxdığı qoldan sonra "Dinamo" hücumlarının kəsərini daha da artırıb. Tbilisi təmsilçisi istəyinə 36-cı dəqiqədə çatıb. Serbiyalı hücumçu cərimə meydançasının çölündən qüvvətli zərbə ilə bərabərlik qolunu vurub - 1:1. İlk yarı elə bu hesabla yekunlaşıb.
İkinci hissəyə "Neftçi" daha fəal başlayıb. Tədricən üstünlüyü ələ alan "ağ-qaralar" 56-cı dəqiqədə penalti qazanıb. İsrailli referi David Fuksman Ələskərova qarşı kobudluğu 11 metrlik cərimə zərbəsi kimi dəyərləndirib. Mahmudovun ilk zərbəsini "Dinamo"nun qapıçısı qaytarsa da, baş hakim onun qapı xəttindən irəli çıxdığını bildirərək, zərbənin təkrarlanmasını istəyib. Kapitan bu dəfə dəqiq olub.
Bu qoldan sonra meydan sahibləri yenidən bərabərlik qolunu vurmaq üçün irəli atılıblar. Lakin bu dəfə "Neftçi"nin müdafiə xətti rəqibin hücumlarının kəsərli alınmasına imkan verməyib. Beləliklə, "Neftçi" səfər oyununda "Dinamo" üzərində qələbə qazanaraq, iyulun 14-də "Bakcell Arena"da keçirəcəyi cavab oyunu üçün böyük üstünlük əldə edib. Həmin qarşılaşma saat 21:00-da start götürəcək.
***
Gürcüstanın paytaxtı Tbilisidə keçirilən Çempionlar Liqasının I təsnifat mərhələsinin ilk oyununda "Neftçi" yenidən "Dinamo" önündə hesabda irəli keçib.
"Report"un matçı canlı izləyən əməkdaşının verdiyi məlumata görə, 56-cı dəqiqədə referi meydan sahiblərinin qapısına penalti təyin edib. Emin Mahmudovun ilk zərbəsini qapıçı tutub. Lakin baş hakim zərbə zamanı qayda pozuntusu qeydə alaraq, penaltinin təkrarlanmasını istəyib. Kapitan bu dəfə dəqiq olub - 2:1.
***
Gürcüstanın paytaxtı Tbilisidə "Dinamo" və "Neftçi" arasında keçirilən Çempionlar Liqasının I təsnifat mərhələsinin ilk oyununda ikinci hissə başlayıb.
"Report"un matçı canlı izləyən əməkdaşının verdiyi məlumata görə, hazırda hesa bərabərdir - 1:1.
***
Gürcüstanın paytaxtı Tbilisidə "Dinamo" və "Neftçi" arasında keçirilən Çempionlar Liqasının I təsnifat mərhələsinin ilk oyununda birinci hissə başa çatıb.
"Report"un matçı canlı izləyən əməkdaşının verdiyi məlumata görə, komandalar fasiləyə 1:1 hesablı bərabərliklə çıxıblar.
Hesabı 23-cü dəqiqədə "Neftçi"dən Namik Ələskərov açıb. 36-cı dəqiqədə isə "Dinamo"nun futbolçusu Zoran Maruşiç tarazlığı bərpa edib.
***
Gürcüstanın paytaxtı Tbilisidə "Dinamo" və "Neftçi" arasında keçirilən Çempionlar Liqasının I təsnifat mərhələsinin ilk oyununda hesab açılıb.
"Report"un matçı canlı izləyən əməkdaşının verdiyi məlumata görə, 23-cü dəqiqədə "Neftçi"nin hücumçusu Namik Ələskərov qapıçı ilə təkbərək çıxaraq, topu "Dinamo"nun qapısına göndərib.
***
Gürcüstanın paytaxtı Tbilisidə "Dinamo" və "Neftçi" arasında Çempionlar Liqasının I təsnifat mərhələsinin ilk oyunu başlayıb.
"Report"un matçı izləyən əməkdaşı xəbər verir ki, görüş Boris Payçadze adına "Dinamo Arena"da keçirilir.
Matçı 55 min tamaşaçı tutumuna malik stadionun 40 faizinədək azakeşin izləməsinə icazə verilsə də, görüşə maraq xeyli azdır. Tribunalarda cəmi 5 000-dək tamaşaçı var.
***
Gürcüstanın paytaxtı Tbilisidə UEFA Çempionlar Liqasının I təsnifat mərhələsinin ilk oyununda üz-üzə gələcək "Dinamo" və "Neftçi"nin start heyətləri açıqlanıb. "Report"un qarşılaşmaya ezam olunmuş əməkdaşı xəbər verir ki, komandalar meydana aşağıdakı "11-lik"lə çıxacaqlar:
"Dinamo": 30. Roin Kvasxvadze, 6. Bakar Kardava, 8. Milan Radin, 9. Giorgi Qabedava, 12. Levan Xarabadze, 15. Giorgi Papava (kap.), 19. Simon Qbeqnon, 21. Giorgi Kutsiya, 22. Fabian Sporkslede, 32. Zoran Maruşiç, 39. Saba Xvadagiani
"Neftçi": 30. Aqil Mammadov, 3. Mamadu Mboc, 6. Voislav Stankoviç, 7. Namik Ələskərov, 8. Emin Mahmudov (kap.), 10. Sezar Meza Kolli, 11. Harramiz Suareş, 20. Mert Çelik, 24. Yusuf Laval, 29. Sabir Buqrin, 36. Mamadu Kane
Qeyd edək ki, Boris Payçadze adına "Dinamo Arena"da təşkil olunacaq qarşılaşma Bakı vaxtı ilə saat 20:00-da başlanacaq.
pia.az
Digərxəbərlər
Populyar xəbərlər
