Moldovada avtomobil Rusiya səfirliyinin darvazasına çırpılıb...

“Mercedes” markalı avtomobili idarə edən şəxs Moldovanın paytaxtı Kişinyovda avtomobili Rusiya səfirliyinin darvazasına çırparaq hadisə yerindən qaçıb.

Poliqon TASS Agentliyinə istinadən xəbər verir ki, bu barədə çərşənbə günü, Moldovanın Baş Polis Müfəttişliyinin mətbuat xidməti məlumat yayıb.

Məlumatda qeyd edilir ki, avtomobili idarə edən şəxs polisin saxlama tələblərinə baxmayaraq, hərəkətini davam etdirib. Yolda o, daha iki avtomobilə ziyan vurub. Moldovanın hüquq-mühafizə orqanlarının nümayəndələri sürücünü saxlamağa nail olublar.

“Hazırda bütün zəruri prosessual hərəkətlər həyata keçirilir”, deyə mətbuat xidmətinin məlumatında deyilib. Onlar hadisənin yerli vaxtla səhər saat 6:00 radələrində (Bakı vaxtı ilə 7.00) baş verdiyini qeyd ediblər.

Poliqon.info