Fidan isveçli həmkarı ilə NATO-ya qəbulu prosesini müzakirə edib...

Türkiyənin xarici işlər naziri Hakan Fidan isveçli həmkarı Tobias Bilström ilə telefon danışığı zamanı İsveçin NATO-ya daxil olması ilə bağlı gələcək işlərlə bağlı məsələləri müzakirə edib.

Poliqon xəbər verir ki, bu barədə “Anadolu” Agentliyi mənbələrə istinadən məlumat yayıb.

“Onlar İsveçin NATO-ya üzv olmaq istəyi ilə bağlı fikir mübadiləsi aparıblar”, deyə Türkiyə XİN-dəki mənbələr Agentliyə bildiriblər.

Bundan başqa, Fidan telefon söhbət zamanı İsveçdə vaxtaşırı “söz azadlığı adı altında” Quranın yandırılması aksiyalarının yolverilməz olduğunu xatırladıb.

Qeyd edək ki, İslam Əməkdaşlıq Təşkilatı (İƏT) iyulun 31-də İsveç və Danimarkada Quranın yandırılması hadisələrinə həsr olunmuş üzv ölkələrin xarici işlər nazirlərinin fövqəladə iclasını çağırıb.

Poliqon.info