Türkiyənin hakim Ədalət və İnkişaf Partiyasının (AKP) rəsmi nümayəndəsi Ömər Çelik bildirib ki, ölkə prezidenti Rəcəb Tayyib Ərdoğanın "son seçkilər"lə bağlı dediyi sözlər onun siyasətdən getməsi demək deyil...
Poliqon xəbər verir ki, bu barədə Türkiyənin "Hürriyet" qəzeti məlumat yayıb.
Ömər Çelikin sözlərinə görə, Ərdoğan "son seçkilər"lə bağlı bəyanatını konstitusiya ilə səlahiyyətlərinin məhdudlaşdırılmasını əsas gətirərək verib.
"Bu siyasətdən getmək vədi deyil. Belə bir siyasi gündəm yoxdur", deyə AKP rəsmisi bildirib.
Qeyd edək ki, martın 8-də Türkiyə prezidenti mövcud qanunvericilik nəzərə alınmaqla, martın 31-də keçiriləcək bələdiyyə seçkilərinin onun üçün yekun seçki olacağını bildirib:
"Mövcud qanunvericilik nəzərə alınmaqla, martın 31-də keçiriləcək bələdiyyə seçkiləri mənim üçün yekun olacaq. Mənim üçün bu finaldır. Bu seçki mənim qanunla verilən səlahiyyətlər çərçivəsində sonuncu seçkimdir. Nəticədə işlər məndən sonra gələcək qardaşlarıma keçəcək.
Türkiyə Ədliyyə Nazirliyinin keçmiş rəhbəri, millət vəkili Bəkir Bozdağ siyasi karyerasını başa çatdıracağını deməsinə rəğmən, Ərdoğanın daha bir müddətə namizədliyinin irəli sürülməsini istisna etməyib. Bozdağ qeyd edib ki, Türkiyə konstitusiyasına görə, bir şəxs ardıcıl olaraq maksimum iki müddət ölkə prezidenti postunu tuta bilər. Eyni zamanda, əsas qanunda göstərilir ki, növbədənkənar seçkilər keçiriləcəyi təqdirdə eyni prezidentin üçüncü müddətə namizəd olması mümkündür.
"Əgər konstitusiyaya uyğun olaraq Türkiyə parlamenti prezidentin ikinci müddətində növbədənkənar seçkilərə qərar verərsə, prezidentimiz Ərdoğanın konstitusion olaraq namizəd olmaq hüququ olacaq", deyə deputat vurğulayıb.
Poliqon.info