“DQ-nin “müdafiə ordusu” anlayışı nədir və Dağlıq Qarabağ nə zaman silahsızlaşdırılacaq?..

Azərbaycan Sosial Demokrat Partiyasının sədri: “Əgər deyirlərsə ki, erməni hərbiçiləri Qarabağdan çıxacaq, deməli onlara Azərbaycan tərəfindən deyilən sözlərin təsiri olub”.

“Ermənistan nümayiş etdirdiyi mövqeni davam etdirsə, Azərbaycan məcbur olacaq Xankəndində anti-terror əməliyyatları həyata keçirib, oranı erməni hərbiçilərindən təmizləsin”.

Bu sözləri Azərbaycan Sosial Demokrat Partiyasının sədri Araz Əlizadə erməni hərbiçilərinin Qarabağdan çıxarılmasına münasibət bildirərkən qeyd edib.

Dünən Ermənistan Təhlükəsizlik Şurasının katibi Armen Qriqoryan bildirib ki, erməni hərbiçiləri sentyabra qədər Qarabağdan çıxacaq: “Bu o demək deyil ki, “Dağlıq Qarabağ” müdafiəsiz qalır. “DQ”-nin müdadfəsini və təhlükəsizliyini “DQ”-nin “müdafiə ordusu” yerinə yetirirdi və bu mənada heç bir şey dəyişmir. Ancaq onu da qeyd etməliyəm ki, “Dağlıq Qarabağ”ın təhlükəsizliyinin qarantı Rusiya sülhməramlıları olmalıdır”, deyə Ermənistan Təhlükəsizlik Şurasının katibi bildirib.

Təhlükəsizlik Şurasının katibi əlavə edib ki, geri çəkilmə prosesi başa çatmaq üzrədir və sentyabrda tam yekunlaşacaq.

Qriqoryanın bu bəyanatına inanmaq olarmı və ermənilərin “müdafiə ordusu” dedikləri qanunsuz hərbi birləşmələr ləğv olunmayana qədər Ermənistanın Xankəndindəki hərbi varlığına son verilməsi prinsipcə mümkündürmü? Hər şeydən əvvəl ermənilərin “müdafiə ordusu” 10 noyabr bəyanatında yer almadığı halda, bu terrorist hərbi birləşmə necə legitim status qazana bilər və Azərbaycan ərazilərində öz varlıqlarını davam etdirə bilərlər?

Mövzunu PİA.az-ın əməkdaşı Sosial Demokrat Partiyasının sədri Araz Əlizadə ilə müzakirə edib.

Araz Əlizadə: “Ermənistan bu gün dediyini sabah başqa cür deyir və kimlərisə də günahkar çıxmağa çalışır”.

Ermənistanın Azərbaycan tərəfinin təsirinə məruz qalıb hərbiçilərini Qarabağdan çıxardıqlarını düşünən partiya sədri bildirib ki, bu prosesi son ana qədər izləmək lazımdır:

“Əgər deyirlərsə ki, erməni hərbiçiləri Qarabağdan çıxacaq deməli onlara Azərbaycan tərəfindən deyilən sözlərin təsiri olub. Ermənistan Azərbaycan tərəfinin təsirinə məruz qalıb hərbiçilərini Qarabağdan çıxarırlar. Amma bu prosesi son ana qədər izləmək lazımdır. Çünki Ermənistan bu gün dediyini sabah başqa cür deyir və kimlərisə də günahkar çıxmağa çalışır.

Ermənistan elə etməsin ki, biz Xankəndində anti-terror əməliyyatları keçirək. Ermənistan nümayiş etdirdiyi mövqeni davam etdirsə, Azərbaycan məcbur olacaq Xankəndində anti-terror əməliyyatları həyata keçirib, oranı erməni hərbiçilərindən təmizləsin.

Ermənistanın terrorist hərbi birləşmələri heç bir legitim status qazanmayıb. Onlar sadəcə olaraq qondarma qurumun qondarma ordusu kimi oradadırlar”.

Nərminə UMUDLU
pia.az