Borrell LGBT və xarici agentlərə qarşı qanunların geri götürülməsi üçün Gürcüstana maliyyə vəd edib...
Aİ-nin xarici siyasət rəhbəri Josep Borrell bütün antidemokratik qanunların, ilk növbədə, gey təbliğatına və xarici agentlərə yönəlmiş qanunların geri götürülməsi müqabilində Gürcüstana Avropadan maliyyə ayrılmasını bərpa edəcəyinə söz verib.
Poliqon xəbər verir ki, dekabrda vəzifəsindən gedəcək olan Borrell bu barədə Strasburqda Avropa Parlamentinin sessiyasında çıxışında bildirib.
“Avropa İttifaqı Gürcüstan hökumətinin anti-demokratik addımlarına cavab olaraq Gürcüstanın Aİ-yə inteqrasiyası prosesini əngəllədi, siyasi dialoqun səviyyəsini aşağı saldı və Avropa Sülh Fondu vasitəsilə hərbi yardımı dayandırdı”, deyə Borrell çıxışında xatırladıb.
Aİ-nin xarici siyasət rəhbəri Josep qeyd edib ki, bu sanksiyaları geri çəkmək heç də problem deyil.
“Bu tədbirlərə yenidən baxıla bilər və hər şey çox sadədir. Sadəcə Gürcüstan hakimiyyətinin siyasi iradəsi lazımdır. Onlar buna Avropa Birliyinə daxil olmaq barədə bəyan etdiyi məqsədə zidd olan qanunları ləğv etməklə başlamalıdırlar. Bu, xüsusilə əsas hüquq və azadlıqları məhdudlaşdıran qanunlara aiddir”, deyə Borrel Tbilisiyə mesaj göndərib.
Poliqon.info