Arutunyan inteqrasiyadan imtina etdi... - Separatçıların bu mövqeyi gələcək üçün nə vəd edir?

Siyasi-şərhçi: “Rusiya Müdafiə Nazirliyinin 5 martdakı insidentlə bağlı Azərbaycan tərəfini suçlamasından, atəşkəsi guya bizim hərbçilərin pozması ilə bağlı bəyanatından sonra separatçı rejiminin rəhbəri özündə “cəsarət” tapdı. Demək onu ipini əlinə yığdıqları Kreml danışdırır”.

“Arutyunyan sona qədər mübarizə aparacaqlarından və Azərbaycan tərəfin təklifini rədd etdiklərindən danışır, adama deyirlər sən kimsən?”.

Bu sözləri siyasi-şərhçi Cavanşir Abbaslı separatçıların başçısı Araik Arutunyanın son bəyanatını Poliqon.info-a şərh edərkən qeyd edib.

Dünən separatçıların başçısı Araik Arutunyan bildirib ki, onlar Azərbaycanın inteqrasiya ilə bağlı təklifini rədd ediblər. Arutunyan bildirib ki, sona qədər mübarizə aparmaqda qərarlıdırlar. Separatçıların bu mövqeyi gələcək üçün nə vəd edir? Proseslərin sülhlə və inteqrasiya ilə inkişafı olmayacaqsa, Qarabağ ermənilərini nə gözləyə bilər?

Mövzunu Poliqon.info-un əməkdaşı AĞ Partiya sözçüsü, siyasi-şərhçi Cavanşir Abbaslı ilə müzakirə edib.

Cavanşir Abbaslı: “Sülh sazişi üçün rəsmi Bakı cəhdlərini yenə də sürdürəcək. Sonda nəyəsə nail olunmasa, son sözü ordumuz deyəcək”.

Qarabağdakı separatçıların mövqeyinin heç nəyi həll etmədiyini vurğulayan ekspert qeyd edib ki, burada söz sahibi olan bir tərəf var. O da Azərbaycandır:

“Arayik Arutyunyanın bu sərsəmləmələrinə təəccüblənmək lazım deyil. Diqqət edin. Bu açıqlamalar nə vaxt verildi? Rusiya Müdafiə Nazirliyinin 5 martdakı insidentlə bağlı Azərbaycan tərəfini suçlamasından, atəşkəsi guya bizim hərbçilərin pozması ilə bağlı bəyanatından sonra separatçı rejiminin rəhbəri özündə “cəsarət” tapdı. Demək onu ipini əlinə yığdıqları Kreml danışdırır. İstədikləri vaxt bu ip çəkiləcək. Sadəcə son günlərdə Rusiya-Azərbaycan münasibətlərində bir qədər soyuq küləklər əsməyə başlayıb və dərhal da erməni xisləti işə düşüb.

Arutyunyan sona qədər mübarizə aparacaqlarından və Azərbaycan tərəfin təklifini rədd etdiklərindən danışır, adama deyirlər sən kimsən? Əslində bununla özünü tərəf kimi göstərməyə çalışır. Amma onu da yaxşı bilir ki, Azərbaycan tərəfi danışıqlar masasına onun “böyüyü” ilə oturur, bundan sonra da elə olacaq. Arutyunyan yuxuda əyləşdiyi o masa ətrafında heç zaman əyləşə bilməz. Azərbaycan tərəfi 3 min şəhidi ona görə verməyib ki, quldurbaşı masa ətrafına havadarları vasitəsilə gətirilsin. Arutyunyan sona qədər döyüşməkdən utanmadan danışır. Adama deyərlər ki, ay quldurbaşı, nə ilə döyüşəcəksən? Əslində burada da qondarma rejimi tərəf kimi göstərməyə çalışır.

Cavanşir Abbaslı: “Arutyunyan yuxuda əyləşdiyi o masa ətrafında heç zaman əyləşə bilməz. Azərbaycan tərəfi 3 min şəhidi ona görə verməyib ki, quldurbaşı masa ətrafına havadarları vasitəsilə gətirilsin”.

Rəsmi Bakının bu barədə mövqeyi açıq və netdir. Ali Baş Komandan başda olmaqla, dövlət rəsmiləri Azərbaycan vətəndaşı olan Qarabağ ermənilərinə orada yaşamalarını və onları öz vətəndaşı kimi qəbul etdiklərini bildirib. Bundan sonrakı seçim onlarındır. Qəbul edəcəklərsə, dinc şəkildə yaşayacaqlar, əks seçim etsələr də, o yerləri tərk etmək məcburiyyətində qalacaqlar. Bunun başqa yolu yoxdur.

Qarabağdakı separatçıların mövqeyi heç nəyi həll etmir. Burada söz sahibi olan bir tərəf var. O da Azərbaycandır. Son sözü Azərbaycan tərəfi deyəcək. Sülh sazişi üçün rəsmi Bakı cəhdlərini yenə də sürdürəcək. Sonda nəyəsə nail olunmasa, son sözü ordumuz deyəcək. Antiterror əməliyyatı ilə erməni terrorçularını Qarabağdan rədd edəcəyik”.

Nərminə UMUDLU
Poliqon.info