ABŞ Venesuela ilə mübahisədə Qayananın suverenliyini dəstəkləyir

Poliqon xəbər verir ki, Blinken ABŞ-ın Venesuela ilə sərhəd mübahisəsində Qayananın suverenliyini dəstəklədiyini bir daha elan edib. Bu barədə Dövlət Departamentinin saytında məlumat verilib.

"Dövlət katibi həmçinin təkrar etdi ki, Birləşmiş Ştatlar mübahisənin sülh yolu ilə həllinə və tərəflər yeni razılaşmalar əldə etmədikcə və ya səlahiyyətli beynəlxalq təşkilat başqa cür qərar verməsə, bütün tərəfləri Venesuela ilə Qayana arasındakı sərhədin demarkasiyasına dair 1899-cu il arbitraj qərarına hörmət etməyə çağırır", deyə departamentin mətbuat xidməti bildirib.

Venesuela prezidenti Nikolas Maduro bu ay qonşu Qayananın qərb hissəsinin - Essequibonun mülkiyyətinə dair referendum təşkil edib. Bu yaxınlarda orada zəngin neft yataqları aşkar edilmişdi. Venesuela hakimiyyətinin verdiyi məlumata görə, vətəndaşların təxminən 95%-i regionun ölkəyə daxil edilməsinə səs verib.

Dekabrın 6-da keçirilən referendum nəticəsində Nikolas Maduro qonşu Qayananın qərb hissəsini ölkənin 24-cü ştatı elan edib. Braziliya Venesuela ilə sərhədə zirehli texnika göndərib.

Qayana prezidenti İrfaan Əli "Associated Press"ə bildirib ki, ölkəsi Qayananın Essequibo bölgəsini 24-cü ştatı elan edən Venesuelaya qarşı müdafiə üçün lazım olan bütün addımları atır. Dövlət başçısı deyib ki, Qayana hökuməti ölkə ərazisinin 2/3-ni təşkil edən Essequibonu qorumaq üçün müttəfiqləri və regional tərəfdaşları ilə əlaqə saxlayıb. O, Qayana Silahlı Qüvvələrinin digər ölkələrlə danışıqlar aparmasına aydınlıq gətirib, lakin hansı ölkələrin müzakirə olunduğunu açıqlamayıb: "Əgər Venesuela bu cür ehtiyatsız və avantürist davranmağa davam edərsə, region buna cavab vermək məcburiyyətində qalacaq. Bizim etdiyimiz məhz budur. Biz regional cavab hazırlayırıq".

Dekabrın 6-sı axşam saatlarında Qayana Ordusu Venesuela sərhədi yaxınlığında helikopterlə əlaqəni itirdiyini bildirib. Qayana Müdafiə Qüvvələri (GDF) bildirib ki, helikopterlə Venesuela ilə həmsərhəd Arau kəndindən 48 km aralıda olarkən onunla əlaqə kəsilib.

Helikopterdə üç ekipaj üzvü və dörd sərnişinin olduğu dəqiqləşdirilir. Bildirilir ki, helikopter koordinatları olan fövqəladə lokator siqnalı göndərib, bundan sonra əlaqəni dayandırıb. Qayana ordusunun bildirdiyinə görə, axtarış-xilasetmə əməliyyatına bölgədəki əlverişsiz şərait mane olur.

Poliqon.info