Ağ Ev danışıqların Şimali Koreyadan hərbi təchizatla bağlı olduğunu iddia edir...
Bayden administrasiyası iddia edir ki, Rusiya Şimali Koreya ilə hansısa gizli danışıqları davam etdirir. Müzakirələr Ukraynada istifadə üçün sursat və materialların alınmasından gedir.
Poliqon Reuters Agentliyinə istinadən xəbər verir ki, Ağ Evin milli təhlükəsizlik sözçüsü Con Kirbi Moskvanın birbaşa hərbi təchizatla yanaşı, öz müdafiə sektorunu dəstəkləmək üçün xammal almaq barədə sazişi nəzərdən keçirdiyini bildirib.
Kirbi Rusiyanın müdafiə naziri Sergey Şoyqunun Şimali Koreyaya səfəri zamanı Rusiyaya artilleriya mərmilərinin satışı ilə bağlı danışıqlar apardığını bildirib. Kirbi əlavə edib ki, ABŞ müdafiə nazirinin səfərindən sonra başqa bir qrup Rusiya rəsmisinin Pxenyana getdiyini göstərən kəşfiyyat məlumatlarına malikdir.
Bundan əlavə, ABŞ-ın BMT-dəki daimi nümayəndəsi Linda Tomas-Qrinfild də ABŞ, Yaponiya, Cənubi Koreya və Böyük Britaniya adından BMT-də bəyanatla çıxış edib. Diplomat Rusiya və Şimali Koreya arasında istənilən silah müqaviləsinin BMT Təhlükəsizlik Şurasının qətnamələrini pozacağını bildirib.
Poliqon.info