Rusiya Xarici İşlər Nazirliyinin sözçüsü Mariya Zaxarova Azərbaycan və Ermənistanın XİN başçılarının Vaşinqtondakı görüşünü şərh etməyib. O, bunu tərəflərin bəyanatlarından sonra edəcəyini qeyd edib...
Poliqon “Sputnik Ermənistan”a istinadən xəbər verir ki, Zaxarova Vaşinqtonda danışıqların Rusiyanın iştirakı olmadan getdiyini, ona görə də iştirakçılardan proses barədə soruşmaq lazım olduğunu bildirib.
“Yəqin ki, görüşdən sonra bəyanatlar verildikdə və tərəflər çıxış etdikdə rəy formalaşdırmaq mümkün olacaq. Ola bilsin ki, bu, bizə şərh vermək üçün imkan yaradacaq. Amma indi danışmaq tezdir”, deyə Rusiya Xarici İşlər Nazirliyinin sözçüsü bildirib.
Ermənistan və Azərbaycan XİN rəhbərlərinin Moskva görüşünün perspektivlərinə gəlincə, Zaxarova bu barədə əvvəllər də danışdığını xatırladıb: “İrəvan və Bakı bu görüşə hazır olduqlarını təsdiqləyiblər. Tarix daha sonra açıqlanacaq”, deyə Zaxarova vurğulayıb.
Qeyd edək ki, mayın 1-də Azərbaycanın xarici işlər naziri Ceyhun Bayramovla Ermənistanın XİN başçısı Ararat Mirzoyan ABŞ-ın dövlət katibi Entoni Blinkenlə ayrı-ayrılıqda görüşüb, sonra onun iştirakı ilə üçtərəfli görüş keçiriblər. Ermənistan və Azərbaycan xarici işlər nazirləri arasında Vaşinqtonda danışıqlar bir neçə gün davam edəcək.
Poliqon.info