Co Baydenin Varşavadakı çıxışında Rusiyaya qarşı ağır və çox ciddi ittihamlar var idi...
Politoloq: “Bu il biz Rusiya-Qərb müharibəsini biz daha yeni və genişmiqyaslı mərhələsini müşahidə edəcəyik”.
“Hesab edirəm ki, çox tez zamanda döyüş əməliyyatları teatrında olan qarşıdurma başa çatmayacaq. Ukrayna-Rusiya müharibəsi uzunmüddətli müharibəyə oxşayır”.
Bu sözləri politoloq İlyas Hüseynov ABŞ prezidenti Co Baydenin Rusiyaya qarşı səsləndirdiyi ittihamları Poliqon.info-a şərh edərkən qeyd edib.
ABŞ prezidenti Co Bayden Varşavadakı çıxışında Rusiyaya qarşı ağır və çox ciddi ittihamlar səsləndirdi. Bu ittihamlar nədən xəbər verir və sizcə Baydenin dünənki çıxışından sonra Ukrayna üzərindən hazırda Qərb-Rusiya qarşıdurması hansı mərhələyə qədəm qoydu?
Rusiya-Ukrayna müharibəsinin yeni mərhələsini Poliqon.info-un əməkdaşı Sosial Tədqiqatlar Mərkəzinin (STM) sektor müdiri, politoloq İlyas Hüseynov ilə müzakirə edib.
İlyas Hüseynov: “ABŞ-ın 46-cı prezidenti Co Bayden Ukraynaya və Polşada səfərlər etdi. Bu səfər çərçivəsində də Bayden çox ağır ittihamlar söylədi”.
Nüvə təhdidi ilə bağlı olan fikirlərin getdikcə geniş vüsət almasına nəzər yetirən politoloq bildirib ki, bu da planetin təhlükədə olmasından xəbər verir:
“Artıq Rusiya-Ukrayna müharibəsinin bir ili arxada qalır. Bu bir il ərzində biz çox maraqlı hadisələrə şahidlik etdik. Dünyada qlobal iqtisadiyyatın zərər görməsinə, Rusiya ordusunun irəliləməsinə, sonra geri çəkilməsinə, dörd ərazinin birləşdirilməsi istiqamətinə keçirilən referenduma, Ukrayna ordusunun irəliləyişinə və siyasi-diplomatik görüşlərin heç bir nəticə verməməsinə şahidlik etdik.
Bütün bunların baş verməsi fonunda ABŞ-ın 46-cı prezidenti Co Bayden Ukraynaya və Polşada səfərlər etdi. Bu səfər çərçivəsində də Bayden çox ağır ittihamlar söylədi. Artıq görünür ki, Rusiya-Qərb konflikti çox ciddi məqama qədəm qoyub. Rusiya prezidenti Vladimir Putin də Federal Məclisdə çıxışında Qərbi ittiham etdi, Ukraynadakı rejimi günahlandırdı. Putin müharibənin dayanmayacağı barədə də müəyyən fikirlər ortaya qoydu. Eyni zamanda nüvə təhdidi ilə bağlı olan fikirlər getdikcə geniş vüsət alır. Bu da planetin təhlükədə olmasından xəbər verir.
İlyas Hüseynov: “Bu müharibənin Rusiya-Qərb qarşıdurma olması artıq heç kəsdə şübhə doğurmur”.
Düşünürəm ki, Ukrayna-Rusiya müharibəsi açıq şəkildə üçüncü dünya müharibəsidir. Artıq bu müharibənin adını xüsusi əməliyyat, taktiki operativ tapşırıqların yerinə yetirilməsi qoymaq mümkün deyil. Bu açıq müharibədir və Ukrayna ərazisində gedir və bu müharibənin Rusiya-Qərb qarşıdurma olması artıq heç kəsdə şübhə doğurmur.
Düşünürəm ki, bu il biz Rusiya-Qərb müharibəsini biz daha yeni və genişmiqyaslı mərhələsini müşahidə edəcəyik. Ukraynaya verilən silah-sursatların miqyası, texnika və texnologiyaların genişliyi bunu deməyə əsas verir. Rusiya da bir neçə nöqtədə çox ciddi insan resursları səfərbər edib və texnikalar toplayır. Bu da müharibənin gedişində dönüş nöqtəsi yaratmaq üçün tərəflərin istəklərini göz önünə gətirir.
Hesab edirəm ki, çox tez zamanda döyüş əməliyyatları teatrında olan qarşıdurma başa çatmayacaq. Ukrayna-Rusiya müharibəsi uzunmüddətli müharibəyə oxşayır”.
Nərminə UMUDLU
Poliqon.info