“Rusiya Qarabağa “sülhməramlı” adı altında hərbi qüvvə yeritdi” - Politoloq

“Rusiyanın Qarabağda “sülhməramlı” missiyasının əsas məqsədi heç də regionda qalıcı və etimadlı sülhə nail olmaq deyil”.

Bu sözləri politoloq Nəsimi Məmmədli Rusiya sülhməramlılarının Qarabağda etimad qazanıb qazanmayacağını PİA.az-a şərh edərkən qeyd edib.

Azərbaycan ictimaiyyəti noyabrın 10-da sülhməramlı sözü ilə yenidən rastlaşdı. Azərbaycan Prezidenti İlham Əliyev, Rusiya prezidenti Vladimir Putin və Ermənistanın baş naziri Nikol Paşnyan arasında imzalanan bəyanatla cəbhədə atəşkəs elan edildi.

Lakin hazırda Rusiyanın sülhməramlı adı altında Dağlıq Qarabağa yerləşdirdiyi texnika nə hücum silahları onu deməyə əsas verir ki, Moskvanın məqsədi heç də sülhməramlı qüvvə kimi fəaliyyət göstərmək deyil. Xüsusən Rusiyanın Kəlbəcər və Laçın da daxil olmaqla bütün ərazini öz nəzarəti altına almaq niyyəti açıqca görünməkdədir.

Hazırda Rusiya sülhməramlı qüvvələrlə bağlı yaranmış vəziyyəti PİA.az-ın əməkdaşı politoloq Nəsimi Məmmədliyə müzakirə edib.

Nəsimi Məmmədli: “Rusiya dünyanın heç bir yerinə sülh aparmayıb və apara bilməz”.

Rusiyanın bütün tarix boyu bu bölgədə fəlakət toxumu səpdiyini xatırladan politoloq PİA.az-a açıqlamasında bildirib ki, xalqlar arasındakı bu günkü soyuq münasibətlərin, düşmənçiliyin kökü də məhz Rusiyadan qaynaqlanır:

“Rusiyanın hazırkı sülhməramlı təşəbbüsü heç bir beynəlxalq mandata əsaslanmır. Qarabağda beynəlxalq sülh yaratma öhdəliyi BMT-nin və ATƏT-in nəzarətində olduğu halda Rusiya təktərəfli buraya daxil olub.

Rusiyanın Qarabağda “sülhməramlı” missiyasının əsas məqsədi heç də regionda qalıcı və etimadlı sülhə nail olmaq deyil. Rusiya faktiki olaraq Qarabağa “sülhməramlı” adı altında hərbi qüvvə yeritdi. Dolayısı ilə bu, hüquqi libasa bürünmüş növbəti bir işğal cəhdidir.

Biz Rusiyanın 200 ildən çoxdur bu regionda mövcudluğunu, Qafqaz xalqları ilə “münasibətlərini” çox cüzi müsbət məqamlarla xatırlaya bilirik. Rusiya hər zaman bu bölgədə fəlakət toxumu səpib. Xalqlar arasındakı bu günkü soyuq münasibətlərin, düşmənçiliyin kökü məhz Rusiyadan qaynaqlanır. Rusiya dünyanın heç bir yerinə sülh aparmayıb və apara bilməz. Bu, onun təcavüzkar xarakterinə uyğun deyil.

Qarabağda aparılan hər 3 müharibədə bütün resursları ilə Ermənistanın yanında yer alıb. Nə 1918-1920-ci illərdə, nə 1988-1994-cü il, nə də indiki müharibədə tərəfsiz davranmayıb. Xüsusilə də 2-ci və 3-cü Qarabağ müharibəsində xalqımıza vurulan dəhşətli yaraların birbaşa iştirakçısı olub.

Nəsimi Məmmədli: “Rusiya dekabrın 1-dək üzərinə götürdüyü öhdəlikləri yerinə yetirməsə Azərbaycan hökuməti təcili olaraq Avropa İttifaqı ilə əməkdaşlığı dərinləşdirməli, NATO ilə yeni münasibətlərə start verməlidir”.

Azərbaycan cəmiyyətinin bütün yetkin insanları Rusiyanın yenidən Azərbaycana daxil olmasından haqlı olaraq narahatdır və bunu mənfi hal sayır.

Əgər Türkiyə ilə hərbi-siyasi əməkdaşlığı yeni formatda Qarabağda davam etdirə bilməsək, bu, ölkəmiz üçün böyük risklərə və təhlükələrə gətirib çıxara bilər.

Rusiya dekabrın 1-dək üzərinə götürdüyü öhdəlikləri yerinə yetirməsə Azərbaycan hökuməti təcili olaraq Avropa İttifaqı ilə əməkdaşlığı dərinləşdirməli, NATO ilə yeni münasibətlərə start verməlidir. Rusiyanın bölgədə təkbaşına mövcudluğu ölkəmizin suverenliyinə və ərazi bütövlüyünə yeni təhlükə mənbəyi olacaq”.

Nərminə UMUDLU
pia.az