Kim Çen In Rusiyaya dünən, sentyabrın 12-də gəlib. O, bu gün, sentyabrın 13-də səhər saatlarında “Vostochnı” kosmodromunda Putinlə görüşüb...
Prezident Vladimir Putin Şimali Koreya lideri Kim Çen Inla Uzaq Şərq regionundakı vəziyyətlə bağlı “səmimi fikir mübadiləsi” apardıqlarını və kənd təsərrüfatını da müzakirə etdiklərini bildirib. Onun sözlərinə görə, iki ölkənin nəqliyyat kommunikasiyaları sahəsində “çox maraqlı” layihələri var.
Poliqon xəbər verir ki, bu barədə “RİA Novosti” Agentliyinin məlumatında bildirilib.
“Başlanğıc yaxşıdır. Çox məhsuldardır. Regiondakı vəziyyət, ikitərəfli münasibətlərlə bağlı çox səmimi fikir mübadiləsi aparılıb”, deyə Putin “Rossiya 1” telekanalının efirində bildirib.
Rusiya prezidenti əlavə edib ki, Kim Çen In Vladivostoka səfər edəcək, burada ona Sakit Okean Donanmasının imkanları göstəriləcək, o, həmçinin Uzaq Şərq Federal Universitetinə gedəcək və Rusiya Elmlər Akademiyasının obyektlərinə baxış keçirəcək. Sonra o, Komsomolsk-na-Amura səfər edəcək.
“Sədrin qarşıda böyük proqramı var. Buradan o, hələ Komsomolsk-na-Amura uçacaq, aviasiya avadanlığının istehsal olunduğu fabriklərə - həm mülki, həm də hərbi təyinatlılara baş çəkəcək”, deyə Rusiya prezidenti vurğulayıb.
Qeyd edək ki, Kim Çen In Rusiyaya dünən, sentyabrın 12-də gəlib. O, bu gün, sentyabrın 13-də səhər saatlarında “Vostochnı” kosmodromunda Putinlə görüşüb. Onların geniş tərkibdə danışıqları bir saata yaxın davam edib. Sonra iki ölkə liderləri arasında təkbətək söhbət olub.
Kreml danışıqların çox məzmunlu keçdiyini bildirib.
Poliqon.info