Tramp Putin və Zelenski arasında danışıqları təşkil edəcəyinə söz verib

ABŞ-ın keçmiş prezidenti və Respublikaçılar Partiyasından prezidentliyə namizəd Donald Tramp rəqibi Demokratlar Partiyasının namizədi Kamala Harrislə debatda Rusiya və Ukrayna arasında danışıqları təşkil edəcəyini və Rusiya prezidenti Vladimir Putin və Ukrayna lideri Vladimir Zelenskini “bir araya gətirəcəyini” deyib.

Poliqon xəbər verir ki, debat ABC telekanalında yayımlanıb.

“Biri ilə danışacağam, digəri ilə danışacağam, onları bir araya gətirəcəyəm”, deyə Tramp bildirib.

Həmçinin debat zamanı Respublikaçılar Partiyasından prezidentliyə namizəd dövlət başçısı vəzifəsinə başlamazdan əvvəl Ukrayna münaqişəsinə son qoyacağını bildirib.

Ötən həftə Tramp qeyd edib ki, onun Ukraynada sülhə nail olmaq planı var, lakin onun təfərrüatlarını açıqlamaqdan imtina edib.

Respublikaçının sözlərinə görə, onun Ukrayna və Rusiyanı dayandırmaq üçün çox dəqiq planı var. O, həmçinin qeyd edib ki, Çinlə bağlı planı olmasa da, fikri var.

Poliqon.info