ABŞ-ın rəhbərlik etdiyi beynəlxalq koalisiyanın qüvvələrinin yerləşdiyi Bağdad Beynəlxalq Hava Limanından bir qədər aralıda partlayış baş verib...
Poliqon xəbər verir ki, bu barədə İraqın Birgə Əməliyyatlar Komandanlığının sözçüsü Tahsin əl-Xəfaci bildirib.
“Təhlükəsizlik və kəşfiyyat bölmələri hadisənin baş vermə şəraitini müəyyənləşdirir. Əlavə məlumat daha sonra veriləcək. Mülki hava hərəkəti pozulmayıb, heç bir reys gecikməyib”, deyə Tahsin əl-Xəfaci bildirib.
“Shafaq News” portalı mənbələrə istinadən yazıb ki, gecə saatlarında ümumilikdə iki partlayış olub. Digəri isə hava limanının yaxınlığında yerləşən İraq Terrorla Mübarizə İdarəsinin qərargahlarından birinin yaxınlığında səslənib.
Xatırladaq ki, son zamanlar Amerikanın Yaxın Şərqdəki hərbi bazalarına hücumlar daha tez-tez baş verir. Avqustun 6-da ABŞ-nin İraqdakı bazasına hücum edilib. Beş Amerika əsgəri yaralanıb. Avqustun 14-də ABŞ-ın Suriyadakı aviabazasına hücum edilib. Xəsarət alanlar barədə məlumat verilməyib.
Poliqon.info