Dieqo Maradonanın varisləri Argentinanın 1986-cı ildə Dünya Kubokunu qazanmasından sonra ona verilən kubokun hərracda satışını dayandırmaq üçün məhkəməyə müraciət edəcəklər...
Poliqon xəbər verir ki, bu barədə Maradonanın varislərinin vəkili Associated Press Agentliyinə bildirib.
Qeyd edək ki, 1986-cı ildə Dünya Çempionatının ən yaxşı oyunçusuna verilən “Qızıl top” kubokuunun müəmmalı şəraitdə onilliklər ərzində yoxa çıxdığı güman edilirdi və kubok bu yaxınlarda yenidən ortaya çıxıb. Keçən həftə “Aguttes” hərrac evi bildirib ki, kubok gələn ay Parisdə hərraca çıxarılacaq.
2020-ci ildə 60 yaşında vəfat edən Maradona 1986-cı ildə Mexikoda keçirilən finalda Qərbi Almaniyaya 3-2 hesabı ilə qalib gələn Argentina yığmasının kapitanı olub.
Maradonanın varisləri kubokun oğurlandığını iddia edərək hazırkı sahibinin onu satmağa haqqı olmadığını deyirlər.
“Paradox Lawyers” şirkətində çalışan hüquqşünas Jil Morye Paris yaxınlığındakı Nanterre məhkəməsinin sədrinə “Qızıl top”un hərracdan çıxarılması üçün təcili müraciət edəcəyini söyləyib. Vəkil AP-yə bildirib ki, kubokun məhkəməyə verilməsini də tələb edəcək və oğurluğa görə şikayət verəcək.
Poliqon.info