Amerikalı və xarici hüquqşünasların koalisiyası ABŞ-ın baş prokuroru Merrik Qarlanda İsrailə silah tədarükünü dayandırmağı tələb edən məktub hazırlayıb...
Poliqon xəbər verir ki. bu barədə Politico qəzeti məlumat yayıb. Bu günə qədər məktubu 90-dan çox hüquqşünas imzalayıb, onlardan ən azı 20-si ABŞ prezidenti Co Baydenin administrasiyasında çalışır.
Məktubda qeyd edilir ki, İsrail ABŞ-ın silah ixracına nəzarət qanunlarını, eləcə də “mülki insanlara qarşı qeyri-mütənasib hücumları” qadağan edən Cenevrə Konvensiyalarını pozmuş ola bilər. Nümunə kimi məktubda “təsadüfi bombardmanlar”, humanitar yardım karvanlarına hücumlar, məktəb və xəstəxanaların bombalanması göstərilir.
Məktubun müəllifləri arasında ABŞ Daxili Təhlükəsizlik Departamentinin, Ədliyyə, Əmək və Energetika nazirliklərinin hazırkı hüquqşünasları, həmçinin Avropa Komissiyasının və özəl sektorun hüquqşünasları var. Onlar həmçinin İsrail ordusunda Amerika vətəndaşları tərəfindən törədilmiş hərbi cinayətlərin mümkün hallarının araşdırılmasına çağırıblar. İmzaların toplanması hələ də davam edir.
Reuters Agentliyinin aprelin 27-də verdiyi məlumata görə, ABŞ-ın bəzi yüksək vəzifəli rəsmiləri dövlət katibi Entoni Blinkenə İsrailin silahlarının beynəlxalq hüquqa uyğun istifadə ediləcəyinə dair verdiyi zəmanətin etibarlı olduğuna inanmadıqlarını bildiriblər. Agentlik yazır ki, bu məsələ ilə bağlı müzakirələr ABŞ Dövlət Departamentində yaranıb. Entoni Blinken mayın 8-dək bu məsələ ilə bağlı Konqresə hesabat verməlidir.
Qeyd edək ki, aprelin 10-da ABŞ prezidenti Co Bayden İsrailin baş naziri Benyamin Netanyahunun Qəzza zolağında müharibə taktikasını səhv hesab etdiyini bildirib.
Poliqon.info