Macarıstanın Ukraynaya qarşı Zakarpatiya iddiası... - Reallaşa bilərmi?

Siyasi-analitik: “Əslində, Laslo Torotskainin mövqeyi rəsmi Budapeştin mövqeyini ifadə etmir”.

“Məsələ ondan ibarətdir ki, Rusiya bu müharibədə qalib gəlsə, dayanmayacaq. Rusiyanın ilk hədəflərindən biri də münasibətləri nə qədər yaxşı olsa da, Macarıstanla münasibətlərin pozulması ehtimalı ola bilər”.

Bu sözləri siyasi-analitik Kənan Novruzov Macarıstanın Zakarpatiya iddiasını Poliqon-a şərh edərkən qeyd edib.

Macarıstanın millətçi Bizim Vətən Partiyasının lideri Laslo Torotskai deyib ki, Ukrayna Rusiya ilə münaqişədə məğlub olarsa, Zakarpatiya bölgəsini Macarıstana verməlidir.

Macarıstanın Zakarpatiya iddiası reallaşa bilərmi? Ümumiyyətlə, Macarıstanda Ukrayna arasındakı fikir ayrılıqları və ortada olan ərazi iddiaları Rusiya-Ukrayna müharibəsi fonunda regionun gələcəyinə nə vəd edir?

Rusiya-Ukrayna müharibəsi fonunda Macarıstanın mövqeyini Poliqon-un əməkdaşı siyasi-analitik Kənan Novruzov ilə müzakirə edib.

Kənan Novruzov: “Rusiya-Ukrayna müharibəsinin nəticəsi nəyinki Macarıstanı, ən azı Avropanın xəritəsinə təsir edəcək”.

Macar siyasətçinin Ukraynanın geri çəkilməməsi üçün belə bir iddia ilə çıxış etdiyini düşünən analitik əlavə edib ki, Torotskai bir növ Ukraynanı şantaj edib:

“Macarıstanla Ukrayna arasında münasibətlər demək olar ki, soyuqdur. Bunun da bir çox səbəbləri var. Əsas səbəb isə Macarıstanla Rusiya arasında olan iqtisadi əlaqələrdir.

Əslində, Laslo Torotskainin mövqeyi rəsmi Budapeştin mövqeyini ifadə etmir. Bu baxımdan onun dediklərinə köklənməyi də lazım bilmirəm. Amma ssenari olaraq Ukraynanın məğlub olacağı fonunda Zakarpatiya bölgəsini Macarıstana verilməsi mümkündür. Eyni zamanda macar siyasətçi bu açıqlaması ilə həm də onu demək istədi ki, bizim taleyimiz əslində Şərqi Avropadan asılıdır.

Məsələ ondan ibarətdir ki, Rusiya bu müharibədə qalib gəlsə, dayanmayacaq. Rusiyanın ilk hədəflərindən biri də münasibətləri nə qədər yaxşı olsa da, Macarıstanla münasibətlərin pozulması ehtimalı ola bilər. Mən belə başa düşürəm ki, macar siyasətçi Ukraynanın geri çəkilməməsi üçün belə bir iddia ilə çıxış edib. Yəni Torotskai bir növ Ukraynanı şantaj edib.

Onu da qeyd edim ki, Rusiya-Ukrayna müharibəsinin nəticəsi nəyinki Macarıstanı, ən azı Avropanın xəritəsinə təsir edəcək”.

Nərminə UMUDLU
Poliqon.info