Ermənistan hökuməti 2024-cü ildə qarşıya qoyduğu 7%-lik iqtisadi artım hədəfinə nail ola bilməyəcək, çünki bizim belə yüksək rəqəmlərə uyğun iqtisadi potensialımız yoxdur...
Poliqon xəbər verir ki, bunu "Sputnik Ermənistan"a müsahibəsində ölkənin keçmiş maliyyə naziri, dövlət maliyyəsinin idarə edilməsi üzrə beynəlxalq müşavir Vardan Aramyan deyib.
Aramyan proqnozunu üç amillə əsaslandırıb. Birincisi, 2024-cü ildə Ermənistana maliyyə axınının mümkün azalmasıdır. Vardan Aramyanın sözlərinə görə, 2022 və 2023-cü illərdə olduğu kimi, hər il maliyyə axınının 25% artmasına ümid etmək mümkün deyil. Xüsusilə bu, konkret faktorla bağlıdırsa, bu halda Ukraynada vəziyyətin gərginləşməsi və Qərbin sanksiyaları bura aiddir.
Aramyanın fikrincə, Ermənistanın iqtisadi artımının gözlənildiyindən daha çox azalmasının ikinci səbəbi Qərbin Rusiyaya qarşı tətbiq etdiyi sanksiyalar və onların Rusiyanın tərəfdaş ölkələrinə də təsiri ola bilər.
"Qərb sanksiyalardan yan keçmək üçün tədricən hər cür boşluqları bağlayacaq. Bu, Ermənistan, Gürcüstan, Qırğızıstan və Qazaxıstana, Rusiya iqtisadiyyatına hansısa axın və ya yardımın keçdiyi bütün ölkələrə şamil ediləcək. Qərbin təsiri nə qədər güclü olacaq? Bu və ya digər ölkədən konkret partiyalar arasında siyasi dialoqdan asılı olacaq", deyə eks-nazir hesab edir.
Üçüncüsü, Ermənistan iqtisadiyyatı üçün təhlükə Ermənistan-Rusiya münasibətlərində böhranın dərinləşməsi ilə bağlıdır:
"2022-ci ildə Ermənistandan bütün ixracın təqribən 50%-i Rusiyanın payına düşüb. Bu, təsir edici rəqəmdir. Üstəlik, biz Rusiyaya əsasən hazır məhsul ixrac edirdik. Fito-nəzarət alətlərindən istifadə etməklə və yoxlamalarla bu ixracı çox asanlıqla dayandırmaq mümkün olacaq".
Poliqon.ino