İsrail ordusu HƏMAS-ın batalyon komandirlərindən birinin öldürüldüyünü açıqlayıb...
Oktyabrın 30-da İsrail Müdafiə Qüvvələrinin döyüşçüləri Qəzza zolağında HƏMAS-ın şimaldakı briqadasının “Beyt Lahiya” batalyonunun komandiri Nəsim Əbu Ajinayı öldürməyə nail olublar.
Poliqon xəbər verir ki, bu barədə İsrail ordusunun mətbuat xidməti Telegram kanalında məlumat verib. Ajina oktyabrın 7-də İsrailin anklavla həmsərhəd olan Erez və Netiv HaAsara şəhərlərində həyata keçirilən hücumların lideri olub.
“Ordu kəşfiyyatı AMAN və Baş Təhlükəsizlik Xidmətinin kəşfiyyat məlumatlarını rəhbər tutan döyüşçülər dünən, oktyabrın 30-da Həmas-ın şimaldakı briqadasının “Beyt Lahiya” batalyonunun komandiri Nəsim Əbu Ajinanın olduğu əraziyə hücum ediblər”, deyə İsrail ordusunun yaydığı məlumatda bildirilir.
Daha əvvəl İsrail Ordusu həmçinin Hərbi Dəniz Qüvvələri və HƏMAS-ın tank əleyhinə bölmələrinin komandirlərinin ləğv edildiyini açıqlayıb.
Poliqon.info