Şarl Mişel Ursula fon der Leyeni səlahiyyətlərini aşmaqda ittiham edib

Avropa Şurasının rəhbəri Şarl Mişel Avropa Komissiyasının (AK) prezidenti Ursula fon der Leyenin xarici siyasət təşəbbüslərini tənqid edib və onu səlahiyyətlərini aşmaqda ittiham edib.

Poliqon Spiegel jurnalına istinadən xəbər verir ki, nümunə olaraq Mişel Tunislə miqrasiya sazişini göstərib. Onun sözlərinə görə, bu sənəd AK rəhbəri tərəfindən imzalanıb, lakin Aİ Şurası prosesdən kənara qalıb.

Avropa Komissiyasının sözçüsü Arianna Podesta Çarlz Mişelin bəyanatını qismən yalan adlandırıb.

Qeyd edilir ki, Avropa Şurası rəhbərinin xanım fon der Leyenin səlahiyyətlərindən sui-istifadə etməsinə misal kimi göstərdiyi AK və Tunis arasında miqrasiya sazişi bu ilin iyulunda bağlanıb. Avropa Komissiyasının sədri bu sənədi Niderland və İtaliyanın Baş nazirləri Mark Rutte və Corciya Meloni ilə birlikdə imzalayıb. Şarl Mişel vurğulayıb ki, Aİ Şurasının bu prosesdəm “kənarda qalması” anlaşılmazdır.

Avropa Komissiyasının sözçüsü Mişelin bəyanatını qismən yalan adlandırıb və qeyd edib ki, AK iyunun əvvəlindən Tunislə saziş üzrə danışıqlar aparır və mühüm məqamlar və danışıqların gedişi barədə üzv ölkələrin səfirlərini dəfələrlə məlumatlandırıb.

“Komissiya Avropa Şurasının 2023-cü ilin iyul ayındakı yekunları da daxil olmaqla, tam siyasi dəstəyindən istifadə edir və qeyri-qanuni miqrasiya ilə mübarizədə praktiki və effektiv irəliləyiş əldə edir”, deyə xanım Podesta vurğulayıb.

Spiegel qeyd edir ki, Ursula fon der Leyeni səlahiyyətlərini aşmaqda ittiham edərkən, Şarl Mişel özü də Ukraynaya 2030-cu ilə qədər Aİ-yə üzv olmaq perspektivini təklif etməklə səlahiyyətlərini aşır.

Poliqon.info