Politoloq: Hər ötən gün nüvə müharibəsinə daha da yaxınlaşırıq...

Kənan Novruzov: “Böyük Britaniyanın xarici işlər naziri Ceyms Kleverlinin dediklərində ciddi həqiqət var”.

“Ukraynaya olunan bu qədər dəstəyə, yardıma rəğmən Rusiya hələ də geri çəkilməyib. Bu da Qərb müttəfiqləri arasında olan fikir ayrılıqlarını daha da artırır”.

Bu sözləri politoloq Kənan Novruzov Böyük Britaniyanın xarici işlər nazirinin Ukrayna müharibəsi haqqındakı fikirlərini Poliqon-a şərh edərkən qeyd edib.

Xəbər verdiyimiz kimi Böyük Britaniyanın xarici işlər naziri Ceyms Kleverli yerli “The House” jurnalına müsahibəsində deyib ki, bəzi Avropa ölkələri Ukraynadakı müharibədən yorulub, ona görə də dəstəyi azaltmaq barədə düşünürlər.

Ceyms Kleverlinin bu fikirlərini necə dəyərləndirmək olar? Həqiqətən də, Ukraynaya olan dəstək dayana bilərmi və bu baş verərsə, proseslər hansı istiqamatdə cərəyan edə bilər?

Rusiya-Ukrayna müharibəsinin indiki mərhələsini Poliqon-un əməkdaşı politoloq Kənan Novruzov ilə müzakirə edib.

Kənan Novruzov: “ İndiki məqamda Qərbin geri çəkilməyə yeri yoxdur. Ukraynaya silah, hərbi dəstək davam etdirilməlidir”.

Ukraynaya silah, hərbi dəstəyin davam etdirilməsinin vacibliyini xatırladan politoloq Poliqon-a bildirib ki, bu dəstəyin dayandırılması nəyinki Şərqi Avropaya, bütün Avropaya fəlakət gətirə bilər:

“İlk növbədə onu deyim ki, ABŞ və Avropanın Ukraynadakı müharibə ilə bağlı mövqeləri fərqlidir. ABŞ bu müharibədə daha radikaldır və müharibənin uzanmasında birbaşa maraqlıdır. Avropa isə müharibəyə daha loyal yanaşır. Çünki Avropanın Rusiyadan müəyyən qədər qaz asılılığı var. Bu mənada Avropa Rusiya ilə münasibətlərə daha ehtiyatlı yanaşır.

Qeyd edim ki, Ukraynaya olunan bu qədər dəstəyə, yardıma rəğmən Rusiya hələ də geri çəkilməyib. Bu da Qərb müttəfiqləri arasında olan fikir ayrılıqlarını daha da artırır. Çünki onlar sərmayə qoyurlar, vəsait ayırırlar və nəticəsi olmur. Əksinə, həmin ölkələrin özü iqtisadi cəhətdən zəifləyir. Bu mənada Böyük Britaniyanın xarici işlər naziri Ceyms Kleverlinin dediklərində ciddi həqiqət var.

Kənan Novruzov: “Biz gələcəkdə hansısa Avropa rəsmisindən ABŞ-a qarşı ittihamlar eşidə bilərik”.

Mən düşünürəm ki, bu ziddiyyət gələcəkdə Qərb ölkələri arasında daha da artacaq. İndi ABŞ və Avropanın mövqeləri üst-üstə düşmür. Amma hələ ki, eyni koalisiyada, Qərb koalisiyasında təmsil olunurlar. Hətta, gələcəkdə mümkündür ki, ABŞ və Avropa bir-birlərini ittiham etməyə başlasın. Məsələn, biz gələcəkdə hansısa Avropa rəsmisindən ABŞ-a qarşı ittihamlar eşidə bilərik. Bu məni qətiyyən təəccübləndirməz. Çünki əslində, müharibəni başladan ABŞ olub. Yaxud da, deyə bilərik ki, Ukraynadakı müharibə ABŞ-ın layihəsidir.

Əlbəttə, indiki məqamda Ceyms Kleverlinin dediyi kimi, Qərbin geri çəkilməyə yeri yoxdur. Ukraynaya silah, hərbi dəstək davam etdirilməlidir. Bu dəstəyin dayandırılması nəyinki Şərqi Avropaya, bütün Avropaya fəlakət gətirə bilər. Çünki artıq Rusiya idarəolunmaz hala gəlib. Təəssüf ki, hər ötən gün nüvə müharibəsinə daha da yaxınlaşırıq”.

Nərminə UMUDLU
Poliqon.info