ISW: SES-in partlaması nəticəsində ruslar çoxlu mövqelərini itiriblər...

Poliqon xəbər verir ki, bu barədə Amerikanın Müharibə Araşdırmaları İnstitutu (ISW) son hesabatında bildirilib.

Analitiklərin fikrincə, Kaxovka SES bəndinin dağıdılması cəbhənin Xerson hissəsinin coğrafiyasını və topoqrafiyasını xeyli dəyişib. Daşqın Rusiyanın Dnepr çayının şərq sahilində hazırlanmış müdafiə mövqelərini, xüsusən də Qoliya Pristan və Oleşkidəki birinci xəttdəki mövqelərini ciddi şəkildə pozub.

“Kaxovka SES-in bəndinin dağılması Rusiya ordusunun Dnepr çayının şərq sahilindəki mövqelərinə təsir edir. Daşqın Rusiya hərbçilərinin Ukrayna hücumlarına qarşı müdafiə üçün istifadə etmək niyyətində olduğu bir çox birinci dərəcəli səhra istehkamlarını məhv edib. Rusiya şəxsi heyəti və hərbi texnikası rus qoşunlarının Oleşki və Qolya Pristanda cəmləşdiyi əsas məntəqələrdən geri çəkilməyə məcbur olub. Əvvəllər rus qoşunları bu mövqelərdən Xerson şəhərini və Dnepr çayının sağ sahilindəki digər yaşayış məntəqələrini atəşə tutmaq üçün istifadə edirdilər”, deyə analitiklər qeyd edirlər.

Daşqın Rusiyanın sahil boyu minalanmış sahələrini də məhv edib və rus bölmələri su basmış ərazilərdən tələsik 5-15 km uzaqlaşıblar. Ona görə də ruslar indi Ukrayna mövqelərinə artilleriyadan atəş açmaq iqtidarında deyillər.

Poliqon.info