Zelenskinin “sülh planı” və ümidləri…

Poliqon.info xəbər verir ki, Ukrayna prezidenti Vladimir Zelenski “Corriere della Sera” qəzetinə müsahibəsində onun “sülh planı”nın münaqişənin həlli üçün təminat nəzərdə tutduğunu bildirib.

Dövlət başçısı ümidvar olduğunu bildirib ki, beynəlxalq ictimaiyyət birləşəcək və onun ABŞ, Çin və digər “böyük dövlətlər” tərəfindən təminatların daxil olduğu on bəndlik sülh planını dəstəkləyəcək. Ukrayna prezidemtinin sözlərinə görə, bu plan dünya sülhünə nail olmağa yönəlib.

Zelenski həmçinin Çinin Ukraynadakı münaqişə ilə bağlı “praqmatik mövqe tutacağını” gözlədiyini qeyd edib.

“Əks halda üçüncü dünya müharibəsi riski ilə üzləşirik”, deyə Ukrayna prezidenti əlavə edib.

O qeyd edib ki, Çin-Ukrayna münasibətləri həmişə çox yaxşı olub.

“Biz bu illər ərzində intensiv iqtisadi əlaqələr saxlamışıq və bunun dəyişməməsi hər kəsin marağındadır. Hazırda qlobal vəzifə hər hansı nüvə münaqişəsi riskinin qarşısını almaqdır”, deyə Ukrayna lideri bildirib.

Zelenskinin planı on bənddən ibarətdir. Bu planda Ukraynada sülh üçün radiasiya və nüvə təhlükəsizliyi, ərzaq və enerji təhlükəsizliyi, hərbi əsirlərin mübadiləsi, ölkənin ərazi bütövlüyünün bərpası, Rusiya qoşunlarının çıxarılması və hərbi əməliyyatların dayandırılması, ədalətin qaytarılması, eskalasiyanın qarşısını almaq və müharibənin sonunu təyin etmək nəzərdə tutulur.

Poliqon.info