Makron: Fransa və Almaniya Avropanın yenilənməsində öncül olmalıdır

PİA.az xəbər verir ki, bu barədə “RİA Novosti” Agentliyi məlumat yayıb. Fikrini izah edən Makron bildirib ki, söhbət yeni enerji modelinin yaradılması və ekoloji islahatlardan gedir.

“Almaniya və Fransa birlikdə Avropamızın dirçəlişinin öncülləri olmalıdırlar. Hər şeydən əvvəl, söhbət yeni bir enerji modelinin birgə qurulmasında gedir. Ətraf mühitin dəyişməsi üçün lazım olan dövlət və özəl investisiyaları Avropa səviyyəsində sürətləndirməliyik. Biz enerji mənbələrimizin və təchizatlarımızın şaxələndirilməsini başa çatdırmalı və qitəmizdə karbonsuz enerji istehsalını təşviq etməliyik”, deyə Makron bildirib.

O, həmçinin vurğulayıb ki, Fransa və Almaniya Aİ-ni diplomatik və müdafiə sahəsində, kosmosun öyrənilməsi və süni intellekt texnologiyasının inkişafı sahəsində liderə çevriləcək müstəqil geosiyasi gücə çevirmək üçün hərəkətə keçməlidir.

Makron qeyd edib ki, Paris bütün sahələrdə Ukraynanı dəstəkləməyə davam edəcək. Fransa Ukraynanı, Moldovanı və Qərbi Balkan ölkələrini islahatlar yolunda müşayiət edəcək. Paris onlarla Avropa Siyasi Birliyi çərçivəsində əməkdaşlığı gücləndirməyi qarşısına məqsəd qoyub.

Qeyd edək ki, ötən həftə Makron bildirmişdi ki, ABŞ-ın iqtisadi siyasəti Avropanın sənayesi üçün təhlükə yaradır. Onun sözlərinə görə, iqlim və enerji keçidləri, qitənin sənayeləşməsi, eləcə də Avropa sənayesinin strateji muxtariyyəti Aİ iqtisadiyyatının inkişafı üçün vacibdir. Bu sahələrdə görülən işlər avropalılara yaşıl enerjinin inkişafını sürətləndirməyə, həmçinin hasilatı genişləndirməyə imkan verəcək.

pia.az